Editoryal: Wa miduyog sa reporma?

ADUNA nay pipila ka mga kausaban nga gilusad ubos sa administrasyong Aquino. Gihimo na usab ang mahigpit nga pagdaginot sa pundo sa kagamhanan samtang nangita ug dugang tinubdan sa salapi nga magamit sa mga proyekto nga makatabang sa katawhan.

Pipila na usab ka mga sistema ang giusab aron mahimong haum sa tumong sa karong administrasyon.

Apan adunay uban nga ang gibuhat makapuling pa sa mga mata.

Sud-onga lamang ang gihimo sa senado. Si Senador Ping Lacson nga nag atubang og dakong kaso nga double murder ug gani adunay warrant of arrest alang kaniya nga gipagawas sa korte, gihatagan og komite sa senado. Di ba laksot kini?

Samtang di motumaw si Lacson sa iyang giluklokan ug di niya mapamatud an nga wa siya'y sala sa kaso nga double murder di siya makabalik sa senado, di ba?

Nganong wa na lang gihatag ang komite ni Lacson ngadto sa uban nga anaa diha sa senado?

Gikan sa senado motapon kita sa House of Representatives.

Human mikatap ang taho nga si Ilocos Sur Representative Ronald Singson gidakop didto sa Hongkong tungod sa gidiling druga, milihok ang iyang mga kaubang kongresista sa kongreso.

Ang kongreso nagpadala dayon og usa ka tinugyanang kongresista nga mosusi sa kahimtang ni Singson. Aron mapakgang ang mga lungsoranon sa gilaumang pagsaway, gipakatag dayon sa kongreso ang rason nga ang tuyo sa pag-adto sa Hongkong sa ilang sinugo mao ang pagsuta sa hitabo ug kahimtang ni Singson aron pagbasihan sa ilang hukom kun pahawaon ba sa kongreso isip miyembro ang dinakpan.

Dunay mga bitayonon nga Pinoy didto sa Middle East apan duna bay kongresista nga miadto aron susihon ang ilang kahimtang?

Karon ang pangutana -- kang kinsa'ng salapi ang gigasto sa kongresista nga nakigkita ni Singson didto sa Hongkong? Di ba sa mga magbubuhis?

Related Stories

No stories found.
SunStar Publishing Inc.
www.sunstar.com.ph