USA ka lalaki napalgang way nay kinabuhi nga nagbuy-od sulod sa compound sa Camanlangan National High School, didto sa Barangay Camanlangan, lungsod sa Nabunturan, Comval Province, Sabado sa buntag.
Nailhan ang biktima nga mao si Alvin Manait, 22, ug usa ka minero apan wa matino kun diin nagpuyo.
Sumala sa report gikan sa Comval Province Police Provincial Office nga pasado alas 7:00 sa buntag, napalgang wa nay kinabuhi ang biktima nga nagbuy-od sulod sa compound sa nahisgutang tunghaan.
Sa paghiling sa mga otoridad sa lawas sa biktima nasuta nga duna siyay 23 ka mga samad dinunggaban sa nagkadaiyang parte sa iyang kalawasan nga maoy gituohang hinungdan sa iyang hinanali nga kamatayon.
Ulahing nakit-ang buhi ang biktima nga nakig-inom kauban ang usa sab ka minero nga si RR Ligid sulod sa balay nga gipanag-iyahan sa usa ka Zaldy Ligid didto sa maong dapit pasado alas 9:00 sa gabii Biyernes.
Pagkabuntag, naplagan na lamang patay ang biktima nga nabulit og samad dinunggaban ang iyang lawas.
Mga kauban sa biktima nga nag-inon wa na hingkit-i sa pagkakaron sa mga otoridad aron unta kuhaan og mga pamahayag.
Kapulisan sa lungsod sa Nabuntura mihimo na og dugang imbistigasyon sa hitabo. (Marvin Pineda)