USA ka opisyal sa gobyerno gipusil patay alas 12:40 sa gabii, Agosto 22, didto sa siyudad sa Heneral Santos.
Giila sa kapulisan ang biktima nga si Dante Dimeren, hamtong ang pangidaron, ug chief quarantine officer sa Bureau of Fisheries and Aquatic Resources (BFAR)-Soccsksargen.
Gibutyag sa taho gikan sa Philippine National Police (PNP)-Soccsksargen Regional Office, nga samtang gi-parking sa biktima ang iyang pick- up sa Zapote Street, kalit lang kining giduol sa duha ka wala mailhing lalaki nga sakay sa usa ka motorsiklo nga walay plaka ug didto gipusil gamit ang kalibre .45 nga pistola.
Nakaangkon og samad pinusilan sa ulo, dughan, bukton ug liog ang biktima ug gidali sa paghatod sa mga pulis ngadto sa Saint Elizabeth Hospital, apan gideklara sa doktor nga dead on arrival.
Matud pa adunay security guard nga nakakita ug buot untang motabang sa biktima, apan gipusil usab kini apan wala maigo. Misibat usab dayon ang mga suspetsado.
Gipadayon pa ang imbestigasyon aron sayron ang motibo sa krimen ug sa pag-ila sa mga suspetsado. (Edgardo Fuerzas)