DEAD on arrival sa tambalanan ang usa ka ulitawo kinsa gidunggab sa iyang manghud nga lalaki kagahapon sa kaadlawon didto sa ilang balay sa Purok 9, Kilometro 22, Barangay Los Amigos, Tugbok District, siyudad sa Davao.

Si PO2 Dexter Cadoyas sa Tugbok Police Station nag-ila sa biktima nga mao si Jerson Morales Juanico, 26, empleyado sa Philippine Long Distance Telephone Company samtang ang suspetsado mao si Jaymar Morales Juanico, 21, ulitawo ug empleyado sa DBI San Miguel Corp.

Updates on President Benigno Aquino III's presidency

Matud ni Cadoyas sa iyang spot report nga nagkalalis ang managsuon sa alas 12:10 sa kaadlawon tungod sa diyutay lamang nga wa pagsinabtanay.

Ang maong panaglalis, suma ni Cadoyas, misangko sa pagdinapatay sa duha hangtud nga mikuha og hait nga kutsilyo ang suspetsado dayon gidunggab ang biktima.

Si Jerson nakaangkon og samad sa iyang tuong dughan hinungdan nga dali siyang gitabang sa iyang kabanay ug gidala didto sa Isaac Robillo Hospital sa Calinan.

Sa paghiabot sa biktima sa maong hospital, naglingo-lingo ang mga doktor nga nag-atiman kaniya sanglit patay na siyang miabot sa tambalanan.

Si Jaymar, tungod kay nakonsensiya sa iyang gihimo, boluntaryong mitahan sa iyang kaugalingon sa mga sakop sa Tugbok Police Station.

Gihikay na ang kasong parricide sa kapulisan aron ipasaka ngadto sa korte.

Sa laing bahin, namatay sab ang usa ka mag-uuma dihang gitigbas siya sa iyang higala sa alas 7:30 sa gabii niadtong Sabado.

Ang biktima mao si Arsenio Montebon, 24, minyo ug nagpuyo sa Barangay Malabog, Paquibato District, ning siyudad.

Si Montebon namatay dayon dihang gihapsan sa hait nga sundang ni Pederico Bergonyo, alyas Mao, 40, mag-uuma ug nagpuyo sa maong lugar.

Sa imbestigasyon ni PO2 Rufino Hernandez sa Paquibato Police Station, nasayran nga nanihapon ang biktima ug suspetsado niadtong higayona apan nagkalalis ang suspetsado ug iyang asawa.

Ang panaglalis sa magtiayon, suma sa report, gisanta ni Montebon apan nasuko si Bergonyo mao nga iyang gitigbas ang biktima.

Si Montebon nakaangkon og daghang samad sa kalawasan hinungdan sa iyang kamatayon samtang si Bergonyo daling misibat gikan sa crime scene.

Samtang gihaya ang biktima sa Rivera Funeral Homes, gipangita sab sa kapulisan ang suspetsado aron sikupon ug taralon sa korte.