NAGPUROL pa ko didto sa probinsya sa Leyte, kanunay ko na siyang mabati sa radyo sa iyang si kat nga tulumanon sa dyHP RMN Cebu ang programa nga ‘Kini Ang Akong Suliran.’

 

Daghan ang mga tawo nga dunay lantip nga salabutan, apan pipila lang nila  ang maantigong mopasayon sa ilang mensahe. Henyo si Dra. ug Abogada Lourdes Libres Rosaroso ning maong natad. Siya nitaliwan niadtong Biyernes, Agusto 20.

Updates on President Benigno Aquino III's presidency

Siya ang nakapausab sa tradisyonal nga pamaagi sa pagtambag, ug gihangop kini sa minilyon niya nga mga tigsunod. Pintok ug intelehente apan malumo ug kasingkasing – mao kini ang iyang mga marka.

Sayon alang niya ang pagpasayon sa mga komplikado nga hilisgotang medikal o ligal.

Kinsay malimot sa iyang mga analohiya (analogy) o kasusama nga iyang gigamit paghubit sa tinood nga kinaiya sa mga sakit ug mga punto nga ligal?

Nagpatambag: “Katulo na ko kahigayon nga iyang gipamadosan doktora, ug katulo na usab ka higayon nga iya kong gibiyaan, naghigugma ba siya nako?” Rosaroso: “Kamaayo nimo luthangon.”

Makapahinumdom ni nato sa duwa nga luthang niadtong bata pa ta. Nasayod siya unsaon pagpahimata sa tawo.

Pipila nato nga nia sa radyo, telebisyon, o mantalaan maglisod ug konek ngadto sa katawhan hilabi na ngadto sa masa. Dili kita masabtan sa masa kay tua kita nagpuyo sa tore, naglutaw sa  hangin. Ang hinungdan dili ang histgotanan o topic apan ang kapakyas pagpasayon.

Busa, dili maayo nga ang usa magsisibya o magsusulat motuo sa bakak nga ang kalibutan motuyok sa iyang pagkatawo. Kini ang hinungdan nganong bisan ang kinayanohan nga tawo sa kinatumyang bahin sa bukid makasabot sa mga pamahayag ni Rosaroso.

Apan gawas sa iyang kahanas sa natad sa medisina ug balaod (ang akong tinubdan niingon nga nahuman usab ni Rosaroso ang kursong edukasyon ug parmasya), lawom usab ang kaalam ni Rosaroso sa maskomplikado nga  unibersidad sa kinabuhi.

Ang iyang mga tambag motuhop sa kasingkasing sa tawo bisan unsa ka sakit, kay wala kini sambog sa pagpakaaron-ingnon. Dili siya judgmental o ang batasan sa pagpamugos sa kaulingong sukdanan sa moralidad ngadto sa atong isigkatawo. Tataw ang iyang baruganan may labut sa diborsyo, buyag, bughat ug uban pa.

Dalaygon ang tininood niya nga paglaban sa iyang propesyon, mao nga way duda nga daghan nato ang naluwas gikan kaulipnan sa kaignorante.    

Gimahal siya sa masa ug girespeto sa mga maalamon. Sa iyang pagbiya akong gibati nga andam na siya nga moreport ngadto Ginoo, mosaludo ug moingon, mission accomplished!

Timaan nga hilabihan ka kusog ang iyang programa  mao nga wa gayud kini mapulihi sud sa hataas nga panahon ug hangtud karon.  

Sa among kasingkasing magpabilin kang buhi, Dra. ug Abogada Lourdes Libres Rosaroso.

(birada_ruphil@yahoo.com)