NAILA sa tibuok kalibotan ang mga binilanggo sa Cebu Provincial Detention and Rehabilitation Center (CPDRC) tungod sa ilang mass dancing nga nigawas na gani sa CNN ug giapil sa katapusang DVD ni anhing Michael Jackson.

Ang ilang sayaw sa Thriller ni Michael Jackson nga gibutang ni kanhi Capitol security consultant Byron Garcia sa YouTube gitan-aw na sa 43.6 milyunes ka higayon.

Updates on President Benigno Aquino III's presidency

Apan ning bag-o lang nigawas ang taho nga usa ka binilanggo sa CPDRC namatay kay gitabangan og kulata kay nagdumili sa pagsayaw. Abi ba nakog ilang buhian kadtong di mosayaw?

***

Di sayon nga magdungan sa pagsayaw ang kaping sa 1,500 ka mga piniriso. Ang dungan nilang nga lihok ug mga lakang nagpakita sa ilang disiplina. Mao kini ang hinungdan nga nisikat ang mga binilanggo sa CPDRC. Gani dunay mga bloggers nga nagpasiaw nga gusto silang mohimog krimen dinhi sa Sugbo aron nakasulod sa CPDRC ug maapil sa kasikat.

Pero taliwa sa gibaniog nga disiplina, niasoy ang namatay nga binilanggo, si Angelito Cabalquinto, ngadto sa iyang igsuon nga si Angelina, nga sigi diay ang riot sulod sa CPDRC.

“Giingnan ko niya wan a siya kasabot sa kinabuhi didto. Sigi kunog kagubot,” matod pa ni Angelina.

Hain na man ang disiplina pinaagi sa sayaw?

***

Diay balita nga angayan nga kapanaminan sa tanan. Usa ka minibus nga gisakyan sa mga tinun-an sa Don Bosco Technological Center nasangit sa usa ka pine tree sa ngilit sa usa ka bung-aw didto sa lungsod sa Dalaguete niadtong miaging Biyernes.

Kon wa pa ang pine tree, lahos untag kahulog ang maong minibus sa 500 ka tiil nga bung-aw. Kamo na lay hunahuna kon unsay mahitabo sa mga tinun-an nga nagsakay niini.

Mao kana nga gawas nga angay nga butangan og mga barriers kadtong nga delikadong dapit sa atong mga highway, angay usab nga tamnan og mga kahoy.

***

Si Dr. Jocelyn Abellana, usa ka espesyalista gikan sa Department of Health (DOH 7), niasoy sa konseho sa dakbayan sa Sugbo nga di makapugong sa prostate cancer ang masahe nga lingam, kanang masahe sa kinatawo sa usa ka lalake. Ang angay tingaling pangutan-on kadtong dunay mga prostate kay segurado kon way prostate si Dr. Abellana.

***

Nagtipun-og sa House of Representatives ang kapin sa 2,400 ka mga balaudnon nga gipasaka sa atong mga magbabalaod sukad sa pagbukas sa Kongresso sa miaging buwan.

Sumala pa ni Speaker Feliciano Belmonte magkapuliki ang unom ka mga deputy speakers ingon man ang majority ug minority leader sa paghagpat sa maong mga balaudnon aron tan-awon kon wa bay nagkadoble-doble.

Sa akong tan-aw, ang wa na lang ma-file mao ang mga bill sa telepono, tubig ug kuryente.