SA UNANG higayon isip pangulo sa nasod, si Pres. Benigno ‘Noynoy’ Aquino III mohimo sa unang opisyal nga pagbiyahe sa gawas nasod ning semanaha.

Gidapit siya sa United Nations (UN) ug Estados Unidos apan wa gibutyag sa Malacañang ang detalye sa pagbisita sa Presidente.

Updates on President Benigno Aquino III's presidency

Apan, si Sec. Ricky Carandang sa Communications and Strategic Planning nipaklaro nga ang unang pagbiyahe sa presidente sa gawas nasod usa ka ehemplo sa tanang opisyal sa kagamhanan.

Gipasabot ni Sec. Carandang nga di daghang ang delegasyon sa presidente, yano ang ilang pagpuyo ug di mosud sa mga mahalong kan-anan sa US.

Sama sa indirektang gipasabot ni Sec. Carandang ang usa sa mga ulahing pagbisita ni kanhi Pres. Gloria Arroyo sa US nga nigasto og milyon ka pesos sa pagpangaon sa iyang delegasyon sa usa ka mahalong kan-anan.

Ang mensahe nga buot ipaabot sa unang presidente nga ulitawo sa nasod mao ang pagdaginot sa mga piniling opisyal sa paggasto sa kuwarta sa katawhan.

Ang mogawas nga salapi sa kagamhanan kinahanglang makahuluganon sa ilang pagserbisyo sa nasod ug di pagpahayahay sa baga sa pagsuroysuroy sa mga opisyal.

Ang pagbiyahe sa gawas sa nasod komon usab nga kalihokan sa mga opisyal dinhi sa siyudad ug lalawigan sa Sugbo - sama sa trade visits o sisterhood relations. Magdala pa og grupo sa lokal nga media ug ubang magpapatigayon nga di na importante sa delegasyon.

Maayong mapanaminan ang buot ipadangat nga ehemplo ni Noynoy ngadto nila ni Gob. Gwen Garcia nga nagsilbi sa iyang kataposang termino, Mayor Mike Rama sa nagsilbi sa unang termino sa dakbayan sa Sugbo ug ubang mga mayor sa Metro Cebu ug lalawigan - ang mensahe ni Noynoy sa pagdaginot.