MGA alas 8 sa buntag niadtong Septiyembre 8, 1999, gi-serve nila ni Tito ang warrant of arrest alang kang Zaldy. Iyang kuyog sila si Major Vinz. Laing tulo ka mga pulis ning-apas kanila isip back-up.
Sa ilang pag-abot sa dapit ug pagpangutana sa mga tawo, ilang natultolan ang giabangang balay ni Zaldy nga gilibutan og koral. Duna kiniy duha ka mga gate nga puthaw nga pulos kinandaduhan niadtong higayuna.
Nigawas si Nilfa, asawa ni Zaldy, aron makigsulti kang Maj. Vinz. Samtang nagsultihanay ang duha, nigawas si Zaldy nga nagtapis lang og tualya. Nisulti si Nilfa nga iya unang kuhaon ang yawe aron mabuksan ang gate.
Gisultihan sab ni Maj. Vinz si Zaldy sa pag-surrender apan nagdumili kini. Nibalik sa pagsud sa balay ang akusado. Nanawag dayon sila og back-up samtang ilang gihisgutan unsaon sa pagdakop ang akusado. Pagkataodtaod, niabot ang tulo ka mga pulis.
Gikatkat dayon nila ni Maj. Vinz ug Tito ang koral duol sa gamay nga gate samtang ang laing tulo ka mga pulis nanaghuwat sa gawas. Samtang nagpaduol sila sa balay, kalit lang silang gipusil. Naigo si Maj. Vinz sa tiyan samtang si Tito nihapa ug nakigpinusilay kang Zaldy.
Dihang nahutdan og bala si Tito, nibalik siya gawas sa compound samtang niabot usab ang laing grupo sa mga pulis. Didto na motahan si Zaldy kanila.
Lain sab siya og bersyon sa hitabo. Matod ni Zaldy nga niadto sa ilang balay sila si Maj. Vinz. Dihang gisugat kini sa iyang asawa sa gate kay iyang gisugo sa pagsusi kinsa ang nanangpit kaniya, wa kini mopaila nga sila mga pulis. Una sab kadtong higayon nga nakakita siya sa mga pulis.
Niadtong higayuna padung usab siyang maligo. Nibalik ang iyang asawa sa agi ug nipahibawo kaniya nga ang mga lalakeng nangita kaniya nanagdala og armalite.
Nangatkat ang duha ka mga tawo sa ilang koral ug iyang nadunggan ang usa niini nga patyon siya. Diha-diha napugos sa pagkuha sa armas nga gibilin sa iyang higala aron ibaligya.
Iya dayon kining gilimpyuhan, apan aksidente kining nibuto. Wa siya masayod kon duna bay naigo sa pagbuto sa pusil.
Human makabuto ang pusil, nitago siya sa ilang kusina ug diha na mogawas paglabay sa duha ngadto sa tulo ka mga oras.
Niinsister siyang aksidente ang pagbuto sa pusil nga iyang gilimpyuhan niadtong higayuna.
Katuohan ba ang gipanulti ni Zaldy? Tuohan man o di ang iyang sulti, usa lang ang klaro, napatay si Maj. Vinz. Apan base sa asoy sa duha ka mga habig, unsa man nga kaso ang atubangan ni Zaldy, murder o homicide? Kana kon ikaw ang pahukmon?