GIKIHA ang usa ka lalake nga taga dakbayan sa Sugbo nga gipasanginlang nilugos sa usa ka dalaga nga may deperensya sa pangisip.

Ang biktima nimabdos ug nipahimugso sa himsog nga bata.

Updates on President Benigno Aquino III's presidency

Samtang, ang suspek kusganong nihimakak sa pasangil.

Hinuon, nisaad sa pamilya sa biktima nga mosuporta sa bata.

Apan gipasabot sa suspek nga di isipon nga siya maoy amahan sa gipanganak sa babaye.

Bisan sa iyang paghimakak sa pasangil, ang suspek nga si Jonathan Batobato, taga Villa Bulsita, Bulacao, dakbayan sa Sugbo girekomendar sa Cebu City Prosecutor’s Office nga pasakaan og kaso sa korte.

Nitataw ang piskaliya nga ang ebidensya nga gipresentar ni Batobato mas maayo sa korte na lang kini dunggon.

Ning giatubang niyang kasong pagpanglugos ni Batobato, di siya mahimo nga makapiyansa.

Ang biktima nga anaa na sa legal nga panuigon apan ang iyang pangisip naa lang kini sa singko ngadto sa says anyos, nireklamo sa kapulisan nga gihilabtan siya ni Batobato sa makadaghang higayon.

Sa gisaysay sa biktima sa iyang reklamo, tiglaba siya sa mga senina sa suspek.

Dihang mokolekta na unta siya sa bayad sa iyang panglaba, dugang saysay sa biktima, kalit siyang gipasud sa kwarto sa suspek ug gimandoan siyang pahiluton sa iyang lawas dayon gitrangkahan ang pultahan.

Sa wa pa siya gipahilot, nagpasalida una ang suspek og ‘x-rated’ nga salida ug gimandoan siyang unsay iyang nakita sa salida mao usab kini ang buhaton ngadto kaniya.

Gihulagway sa affidavit sa biktima nga naghubo ang suspek dihang gisugo siya niini apan wa siyay nahimo kay gihulga man siya.

Gikataho nga nilampos gyud nga nahilabtan siya unya niresulta nga namabdos siya ug nakaanak.

Base sa gisumiter nga tubag sa korte, si Batobato hugot nga nihimakak sa pasangil kay giingong di mahimo nga makapaanak siya.

Ikaduha, dason niya, ang biktima iyang giisp nga igsuong babaye bisan pa man nga suguon ni niya sa pagpanglaba.

Nipadayag siya nga bisag gisuportahan niya ang pagpanganak ug sa pagpadako sa bata, dason sa tubag ni Batobato, wa kini nagsabot nga iyaha kining anak pero nisuporta siya aron magmalinawon ug nga di siya pasakahag kaso.

Gihulagway niyang di makatarunganon nga mopadayon siya sa paghatag niini og suporta kay di man siya maoy amahan sa bata.

Nagtuo kini nga may lain usab nga nihilabot niining mga lalake nunot sa sitwasyon sa pangisip niini.

Dihang duha ka buwan nga wa siya makahatag og suporta mao usab kini ang higayon nga gipasaka ang kaso batok kaniya.

“A denial unsubstantiated by clear and convincing evidence is negative, self-serving, merits no weight in law, and cannot therefore be given greater evidentiary value than the testimony of a credible witness who testify on affirmative matters,” nagkanayon ang resolusyon nga giandam ni Cebu City Assistant Prosecutor Alex Gabud nga gikutlo ang usa sa desisyon sa Korte Suprema. (JECT)