MGA higanting ‘ilagang pawot’ giingong nidagsa ug nisulong sa police station sa Catmon ug mga bukirang bahin sa nahisgutang lungsod nga nakadaot sa mga lagutmong pananom sa mga mag-uuma.

Sa taho nga nadawat sa dySS Super Radyo giingong mga higanting ilaga naabot na sa lungsod ug giinong daghan niini ang nag-undok sa police station diin gikabalaka sa mga police nga mag-duty gumikan sa kahugaw ug makadaot sa tawo.

Updates on President Benigno Aquino III's presidency

Ang maong mga ilaga nga pwerting dagkua makapanglimbawot ang balahibo nga mosulod sa mga kaldero nga manghuong, sa aparador ug asdang suok.

Si Insp. Leo Ty, hepe sa Catmon police, nagkanayon nga bisag asang dapita sa Sugbo dunay daghang ilaga.

Gipadayag niini nga normal lang kini nga dunay mga ilaga labi na sa panahon sa ting-uwan daghang ilaga apan di tinuod ang taho nga ‘gisulong sa mga ilaga ang ilang police station.

Dugang niya nga daplin sa dan ang ilang police station, duol sa munisipyo sa Catmon ug layo kaayo sa maisan nga pananom nga maoy paborito sa mga ilaga nga ilang kan-on.

Giangkon niya nga duna siyay nakit-ang ilaga diha sa ilang police station apan dili sab daghan ug gagmay’ng lang kini.

“Kuyaw gyud nang ilaga kay nagdala og kagaw pero dili na tinuod nga gisulong og gatosan ka mga ilga ang police station, dunay nagpakatap anan estroyaha,” sumala ni Insp. Ty.

Matud niya nga di maalarma ang taga Catmon kay dili kini tinuod ug ang munisipyo seguradong molihok kon dugay samang hulga.

Apan, dason niya nga wa pay usa ka mag-uuma nga niduol sa police station ug nisumbong bahin sa dangan ilaga.

Nagduda si Insp. Ty nga ang grupo sa sindikato sa dakbayan sa Sugbo, kinsa handler sa tulo ka mga tulisan nga ilang nadakpan, nga maoy nipakatap sa taho ug gitutumoan ug gibinuangan og estorya ang ilang buahatan.

Kini human ilang nadakpan ang tulo ka mga kaubang tulisan nga nadakpan sa miaging buwan.

Bisan pa niini, iyang gimandoan ang iyang mga sakop sa intelligence nga susihon ang mga bukirang barangay kon wa ba atakiha og mga ilaga ang ilang umahan.

Ang Sun.Star Superbalita mokuha pa og kasayoran gikan sa Department of Agriculture (DA) kon nakadawat ba sila sa samang taho bahin sa pag-ataki sa dagkong ilaga sa Catmon. (Guam P. Logroño)