USA ang patay ug usa ang angol sa kasong pagpamusil sa managlahing barangay sa lungsod sa Argao, Sugbo kagahapon sa kaadlawon.

Atol sa disco sa piyesta sa Barangay Alambijod, usa ka Mario Albarina, 54, nagpuyo sa nahisgotang barangay ang gipusil-patay.

Updates on President Benigno Aquino III's presidency

Sa pakisusi ni SPO2 Elizer Monte, imbestigador sa Argao police station, ang biktima gipusil sa iyang paggawas sa diskohan.

Kalit lang nabati ang usa ka sipang buto sa armas ug pagsusi sa mga tawo, nahagba na ang biktima nga naglunang sa kaugalingong dugo.

Gidali sa pagdala sa iyang kahigalaan ngadto sa tambalanan sa lungsod apan gideklarar sa mga doktor nga dead-on-arrival (DOA).

Ang biktima naigo kini sa iyang ulo sa bala sa wa pa matino nga kalibre sa armas nga gigamit sa mamumuno.

Samtang sa Barangay Tulis sa samang lungsod, usa ka Ronald Gillera,38, taga Brgy. Tulic ug kawani sa tambalanan sa nahisgutang lungsod ang gipusil sa tulo ka mga wa

mailhing tawo nga nagsakay og motorsiklo.

Ang biktimang si Gillera, uban kini sa iyang mga higala nga nag-inom dihang kalit lang naabot ang tulo ka mga tawo sakay sa motorsiklo ug namusil makadaghang higayon.

Ang biktima nga nadala sa tambalanan nakaangkog daghang samad pinusilan diha sa iyang bukobuko, tiyan ug walang bukton.

Ang namusil daling nisibat sa dapit sakay sa ilang motorsiklo.

Samtang, wa pa matino sa kapulisan ang motibo sa duha ka mga kaso sa pagpamusil sud lang sa usa ka adlaw.

Samtang, ang kapulisan padayon pa usab sa ilang pagsubay sa mga responsableng tawo sa pagpamusil.