ANG pagsaulog sa 25th Kadayawan Festival malinawon.

Sugod niadtong Agosto 22 ngadto sa 23 nagbaha ang mga tawo sa mga shopping malls, ilabi na kadtong dunay mga gimmik.

Updates on President Benigno Aquino III's presidency

Sa oras gikan sa alas 6 pataas lisud mangita og masakyan tungod sa kadaghan sa mga tawo nga misaksi sa mga kalingawan ug miduyog sa selebrasyon.

Kun basihan ang blotter sa kapulisan, mga ginagmay nga kawat lamang ang natala ug way mga dagkong panghitabo.

Kini gumikan sa makanunayon nga pagbantay sa kapulisan, militar ug ubang otoridad.

Si Task Force Davao deputy commander Lt. Col. Jose Eriel Niembra, dihang gihinabi sa media, nagkanayon nga gisiguro nila nga way makasulod nga mga dautang tawo sa siyudad mao nga nagmuntar sila og mga checkpoints sa Sirawan, Calinan, Buhangin, ug Ilang. Nagbutang usab sila og mga pinakalit nga mga checkpoints. Mibulig usab kanila, sumala ni Niembra ang 10th Infantry Battalion. Sa samang higayon, si DCPO director Sr. Supt. Rene Aspera nagbutyag nga nakatabang sab ang ilang pwersa sa kapulisan lakip na ang mga barangay police sa kalinaw sa pagsaulog sa Kadayawan.

Kinsa ba uroy nga way utok nga kriminal ang maghimo og krimen sa ingon niini kahigpit nga seguridad.

Sa wa pa ang kasaulogan sa Kadayawan, sunod-sunod ang patay dinhi sa siyudad nga gihimo sa mga tawo nga nagsakay og motorsiklo.

Unta tun-an sa pulis ang kahimtang sa kalinaw atol sa selebrasyon sa Kadayawan aron nga makapagawas og paagi alang sa epektibong pagpatunhay sa kalinaw. Kun nahimo nila nga linaw ang Kadayawan, nganong dili kini mahimo human sa selebrasyon.