USA ka trabahante sa sagingan samaron nga gidala sa ospital human gitigbas sa lalaking naghuramentado didto sa Purok Anahaw, Barangay Visayan Village, siyudad sa Tagum, Dominggo sa buntag.
Nailhan ang biktima nga mao si Orlando Mejorada, 42, ug molupyo sa Purok Timog, Barangay Visayan Village.
Sa report gikan sa Tagum City Police Station nasayran nga pasado alas 8:00 sa buntag didto sa maong dapit ang biktima, natigbasan siya sa usa ka lalaking naghuramentado nga nailhan nga mao si Edzel Granada, ug molupyo sa Purok Anahaw, sa susamang barangay.
Ang biktima nasamdan sa iyang nawong ug daling gipatambalan sa ospital.
Wa pa natagbaw ang suspek iya sab gitadtad ang Honda Wave nga motor sa biktima nga giparking didto sa maong dapit.
Bisan sa mga samad nga nahiaguman sa biktima nakahimo pa siya sa pagdangop sa buhatan sa kapulisan.
Mga pulis sa siyudad sa Tagum abtik nga miresponde didto sa nahitaboan sa krimen apan wa na nila naapsan ang suspek human misibat padulong sa wa matino nga lugar.
Kapulisan mihimo na sab og dugang imbestigasyon sa maong hitabo. (Marvin Pineda)