Patay sa walo ka samad

LAWOM nga imbestigasyon ang gihimo karon sa kapulisan aron tugkaron ang motibo ug ilhon ang mipatay sa usa ka mag-uuma kinsa gilubong duol sa balay sa iyang igsuon niadtong Dominggo.

Nakaplagang patay mao si Alberto Dulay, 52, minyo ug nagpuyo sa Purok 9, Barangay Sirib, distrito sa Calinan, siyudad sa Davao.

Si Police Officer 3 Sulficar Sahidain sa Calinan Police Station nagbutyag sa iyang spot report nga ang biktima nakaplagan mga alas 12:00 sa udto pinaagi sa iyang anak nga si Arturo Dulay.

Si Arturo, dihang nadiskubrehan ang nahitabo sa iyang amahan, nangayo dayon og police assistance aron ugkaton ang patay'ng lawas ni Alberto.

Human nadawat sa kapulisan sa Calinan, miresponde dayon si Sahidain aron imbestigahan ang maong hitabo.

Matud ni Sahidain nga ang biktima gilubong mga 110 sentimetro ang gilawmon duol sa balay sa iyang igsuon nga si Rudy Dulay.

Sa gihimong imbestigasyon sa Scene of the Crime Operatives (Soco), ang biktima nakabaton og tulo ka mga samad sa iyang dughan, tulo sa liog ug duha sa iyang tuong braso.

Tungod sa maong hitabo, naningkamot karon ang kapulisan nga mailhan ang naghimo sa maong krimen aron sikopon ug taralon sa korte.

Sa laing bahin, giimbestigahan sab karon sa San Pedro Police Station ang pagpanunggab nga nahitabo sa alas 2:25 sa kaadlawon kagahapon didto sa Duwa, San Rafael, Barangay 10-A Poblacion, ning siyudad.

Ang biktima mao si Ronald dela Torre, 54, minyo, time keeper sa usa ka construction site nga nahimutang sa Duwa ug nagpuyo sa Buhangin, ning siyudad.

Si Police Officer 3 Rodriguez imbestigador sa San Pedro Police Station nagbutyag nga ang biktima nasiplatan sa iyang kauban nga si Almario Pania nga nagkadugo ug nangayo og tabang didto sa construction site.

Wa na gidetalye sa blotter sa kapulisan kung asa gikan ang biktima ug unsa ang hinungdan nganong gidunggab siya.

Ang biktima daling gidala sa Southern Philippines Medical Center (SPMC) samtang ang kapulisan nagsusi na sa maong hitabo. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph