NAKAESKAPO ang 9-time champion University of the Visayas (UV) Green Lancers gikan sa kalit nga pagpanghudlat sa University of Cebu (UC) Webmasters aron iposte ang 82-79 nga kadaugan sa main game niadtong Dominggo sa 2010 Cebu Schools Athletic Foundation Inc. (CESAFI) college division sa Cebu Coliseum.

Sa kadaugan, nakuha sa Green Lan­cers ang solong liderato dala ang 5-0 nga rekord samtang ang Webmasters, usa sa labing inilog karong tuiga, natagak sa 4-1 nga baraha.

Updates on President Benigno Aquino III's presidency

Sa pagpangulo ni Harold Cincoflores, ang Green Lancers ni coach Elmer Cabahug nakapasutoy sa ilang opensiba sa 3rd quarter aron iposte ang labing dako nilang labaw, 58-39.

Hinuon human niadto, hinayhinay nga ninggukod ang Webmasters ni coach Rhoel Gomez ug daw mitabang kanila ang kahigayunan kay na-thrown out man ang usa sa mga sinaligan sa Green Lancers nga si Emmanuel Calo sa nahabiling 4:39 minutos tungod sa duha ka unsportsmanlike fouls.

Nagkumboya sila si Junmar Fajardo, Edward Pao, ug Kelvin Juliane aron pangulohan ang dakong rally sa Webmasters sa 4th quarter nga maoy naghatag kanila og 74-71 nga labaw sa nahabiling 1:51 minutos.

Apan human niadto, sunodsunod nga turnovers ang naangkon sa Webmasters hinungdan nga nabiyaan na sab sila sa Green Lancers, 81-76, sa nahabiling 35 segundos.

Sa laing duwa, nakatilaw na gyud og kadaugan ang University of San Jose Recoletos (USJ-R) Jaguars ug ilang gipahimungtan ang Don Bosco Technological Center (DBTC) Greywolves, 66-59.

Ang Jaguars adunay 1-3 nga rekord samtang ang Greywolves nahagbong sa 1-4 nga baraha.

Puntos kada usa

USJ-R (66)- Lapiz 15, Capillar 13, Amores 10, Dela Peña 6, Bibera 6, Albarillo 4, Suliman 4, Muñez 3, Tabaloc 2, Lajato 1. DBTC (59)- Aldave 24, Hernando 10, Cinco 5, Cortes 4, Luscado 3, Echavez 2, Geraga 2, Guba 2, Tirado 2, Castro 1

UV (82)- Olivares 20, Cincoflores 19, Calo 15, Abad 8, Silva 7, Mercader 6, Avillanosa 4, Perolino 2, Lao 1. UC (79)- Fajardo 18, Pao 17, Juliane 16, Mohamad 14, Bercede 5, Magallanes 3, Heruela 3, Cabrera 2, Enriquez 2.