ANG RA 9994, kun gitawag nga “Expanded Senior Citizens Act of 2010”, nagmando sa paghatag og mga prebilihiyo sa atong mga katigulangan nga nag-edad og 60 ug pataas.

Usa sa mga mehoras nga gihatag sa RA 9994 sa atong mga edaran mao ang 20 porsyento nga diskwento ug VAT exemption sa tanang klaseng palaliton labina na sa tambal.

Updates on President Benigno Aquino III's presidency

Basi sa Article 8 (Credit Card Payments) sa Implementing Rules and Regulations (IRR) sa RA 9994, ang 20 porsyento nga diskwento ug VAT exemption ihatag bisan kon credit card ang gigamit og bayad sa gipalit.

Niadtong gabii sa Miyerkules sa miaging semana akong nasaksihan nga ang akong amigo nga wa hatagi sa iyang prebilihiyo ngan nga senior citizen bisan pa sa iyang pagpakita sa iyang senior ID card tungod kay credit card ang iyang gigamit og bayad sa iyang gipalit nga tambal.

Gani nahimong dugay ang estorya kay nangutana pa ang tindera sa ilang kauban sa trabaho kabahin sa diskwento. Matod pa sa empleyada sa Rose Pharmacy sa Talamban nga walay discount kon credit card ang ibayad.

Pwede natong maingon nga wa pa makahibawo ang mga empleyado sa Rose Pharmacy sa RA 9994. Apan kining RA 9994 nahimong balaod niadto pang Hunyo ning tuiga.

Ang RA 9994 igo lang nagpalapad sa mga ayuda alang sa senior citizens sa unang balaod nga RA 7432, nga naaprobahan niadtong Hunyo 1991, ug giamendar sa RA 8257 niadtong 2004.

Wa ba lang kaha nagpakaaron ingnon wa makahibawo ang mga empleyado sa Rose Pharmacy sa bag-ong RA 9994 kay aron di makahatag og diskwento sa gipalit nga tambal sa akong amigo?

Pagka dakong tulobagon sa mga tag-iya sa Rose Pharmacy kon mopasakag sumbong ang akong amigo sa wa paghatag sa iyang katungod ug pribilihiyo nga gilagda sa RA 9994.

Delikado ang presidente, general manager o managing partner sa Rose Pharmacy kon pasakaan og sumbong sa akong amigo kay sila mao ang moatubang sa kaso base sa Section 5, Article, Rule VII sa RA 9994.

Base sa Section 3, Article 22, Rule VII (Penalties and Sanctions) sa IRR sa RA 9994, usa ka salaod ang di paghatag sa 20 porsento nga diskwento ug VAT exemption bisan kon credit card ang gigamit og bayad sa mga gipalit.

Ang Article 24 sa maong balaod ug lagda mopahamtang og silot sa mga tawo nga di moila sa senior citizen card, ning mosunod:

Section 1. Sa unang pag-lapas, multa nga di ubos sa 50,000 apan di sobra sa P100,000 ug pagpriso nga di ubos sa duha ka tuig apan di molapas sa unom ka tuig; ug

Section 2. Sa sunod nga paglapas, multa nga di ubos sa P100,000 apan di sobra sa P200,000 ug pagpriso sa di ubos sa duha ka tuig apan di sobra sa unom ka tuig.

Di lang hinuon ang naninda o tag-iya sa mga tindahan maoy dunay silot sa kalapasan ani nga balaod. Ang mga tawo o senior citizen nga moabusar og gamit sa maong pribilihiyo duna say tulobagon.

Dako ang pangdaghom sa akong amigo diri nako nga dinhis atong nasod ang balod morag way bili kay di man tumanon sa mga nahingtungdan sama sa mga tindahan ug botica.

Kon manguyogpus lang ang akong amigo sa maong hitabo di mahibaw-an sa atong kagamhanan ang kalapasan nga nahimo sa mga tindahan o botika sa RA 9994 ug mogawas pa nga way bili ning balaora.

(elespinoza53@yahoo.com)