NING nakalabay nga mga buwan, misulbong na sab og kalit ang mga kaso sa dengue fever samtang nagsige na ang uwan.
Gipaabot kining mao nga mga kaso nga mosaka ning bahina sa tuig apan moanam na sab og kanaog pipila ka mga buwan gikan karon.
Nangapuno ang mga ospital, pribado o pampubliko, sa mga bata nga pasyente nga sagad nangasakit sa dengue fever.
Ang mao nga sakit dala sa aedes aegypti nga lamok nga sagad mamaak panahon sa adlaw ug labing aktibo gikan sa alas 6-8 sa buntag ug alas 4 sa hapon ngadto sa alas 6 sa gabii.
Apan wa ni magpasabot nga di ni sila mopaak sa lahing oras sa adlaw. Bisan unsang orasa mopaak ni sila basta matugaw. Sagad anha ni sila mopasok sa ngitngit nga mga lugar sa balay.
Mangitlog sab ang mao nga lamok sa limpyo nga tubig sama diha sa flower vase, ligid sa trak ug uban pang dunay nagluoy nga tubig nga limpyo.
Mahimo sab silang mangitlog sa mga pal-ak sa saging ug ubang mga tanom nga dunay bahin nga mapundohan og tubig.
Di ang kemikal nga ipasirit ang numero unong armas batok ning mao nga matang sa mga lamok. Ang kanunay nga pagpanglimpyo sa palibot maoy labing maayo ug epektibong paagi sa pagsanta sa mao nga lamok nga makasanay ug makapaak.
Busa importante kaayo ang partisipasyon sa matag pamilya ug komunidad pinaagi sa kanunay nga pagpanglimpyo sa palibot.
Utingkayon ang mga dapit nga posibleng itlugan sa lamok ug limpyohan sa kanunay.
Napamatud-an na ang kaepektibo sa pagpanglimpyo batok ning mao nga sakit.
Ayaw huwata kon ikaw maigo na. Di baya lalim ang mamatyan og mahal sa kinabuhi.
Hinumdomi kanunay, makamatay ang dengue fever.