NIKIRIG-PATAY ang usa ka security guard human nakuryentihan sa extension wire sa suga sa garden sa Visayas Memorial Park sa Sitio Cambuntan, Barangay Bolinawan, dakbayan sa Carcar sa milabayng hapon.

Si Maximo Tantog Villordon, 33, minyo, security guard sa maong sementeryo ug nagpuyo sa Sitio Conta, Barangay Can-asojan, dead-on-arrival (DOA) sa tambalanan sa nahisgutang siyudad.

Updates on President Benigno Aquino III's presidency

Si PO1 Julius Aniñon, imbestigador sa Carcar police station nga nahinabi sa Sun.Star Superbalita, nagkanayon nga usa ka babaye nga nanagkot sa nahisgutang sementeryo maoy nipahibalo sa insedente sa insedente ngadto sa awtoridad bahin sa hitabo.

Matud ni PO1 Aniñon nga ang biktima nga si Villordon nakit-an sa nanagkot sa sementeryo nga nagbuy-od na nga way ginhawa nga nagkupot pa sa wang kamot ug extension wire ug sa tuong kamot dunay kutsilyo.

Sa ilang imbestigasyon, ang biktimang si Villordon nikuha sa extension wire nga kutay sa suga sa garden sa sementeryo aron ayuhon ug giingong giablihan niini ang socket nga nagkunektar sa extension wire gamit ang kutsilyo isip screw driver.

Wa niini mahibaw-i nga ang extension wire nga gituohang guba ug duna kiniy buhing kuryente hinungdan nga nga nikirig ang biktima ug wa gyud makabuhi sa gihuptan niining extension wire hangtud kini mamtaay.

“Nasunog ang iyang wang kamot, maayong pagkapaso, ug nilagom na ang lawas nga ilang naabtan nga nagdupa nga nagbuy-od nga walay kinabuhi apan gidala gihapon nila sa tambalanan” sumala ni PO1 Aniñon.

Hinuon, giklaro niini nga way foul play ang kamatayon sa biktimang si Villordon, apan ilang gihapong giduso sa kabanay nga ipa-autopsy ang lawas sa biktima aron mawala ang mga pagduda bahin sa kamatayon niini. Guam P. Logroño