PATAY nga nidangat sa tambalanan ang usa ka bata nga lalake human madasmagi og sakyanan gikan nga namasura pasado alas 6 sa milabay nga gabii sa S. Osmena avenue, North Reclamation Area, dakbayan sa Sugbo.
Ang biktima giilang mao si Welven Dedicatoria, 10, taga Sityo Mahayag, Barangay Subangdaku, siyudad sa Mandaue.
Ang nakadasmag kaniya giilang mao si Arnold Senara, 37, usa ka physical therapist, taga Bayanihan, Basak Pardo, dakbayan sa Sugbo. Siya ang nagmaneho sa Honda Accord (plate number UCE-737).
Sa pasiuna nga imbestigasyon ni SPO1 Porferio Lim sa Traffic Division nagkanayon nga sakay sa iyang traysikad ang biktima gikan nga namasura.
Samtang nagpadagan siya sa daplin sa dalan, kalit siyang nitabok paingon unta sa pikas habig sa dalan.Ang sakyanan ni Serana gikan sa siyudad sa Sugbo ug mopaingon na unta sa siyudad sa Mandaue.(JFT)