GIKALIPAY sa kadagkuan sa kapulisan sa lalawigan sa Sugbo ang kamanduan ni Land Transportation Office Regional Director Raul Aguilos nga dawaton na ang mga temporary operators permit sa mga sakyanang ma-impound sa kapulisan sa kalungsuran sa mga district office sa LTO-7 sa Probinsya.
Si Cebu Provincial Police Director Sr. Supt. Erson Digal nipadayag sa reaksyon human ang mga chief of police sa kalungsuran ningreklamo tungod kay ang mga dukomentong gihuptan sa ilang mga deputized sa LTO-7 police di dawaton sa mga district office sa dakbayan sa Bogo, Danao, Carcar ug Toledo.
Sagad nga reklamo nga sa mga chief of police sa kalungsuran nga ang mga district office sa mga component city igo lang moingon nga gikinahanglan ang mga TOP, citation, pag-impound sa mga sakyanan anha gyud i-turnover sa regional nga buhatan.
Hinungdan nga mabalda ang ubang mga trabaho sa mga pulis sa kalungsuran, samtang gawas nga mahasol mogasto pa gyud silag kaugalingon sa pag-travel na sa mga dukomento dinhi
sa dakbayan kon gikan sila sa laing lugar.
Matod pa ni Digal nga nanghinaot siya nga ang maong kamanduan di lang verbal kon di black and white nga memorandum aron sundon gyud sa mga district office sa LTO-7 nga mga branch.
Siya nidugang nga nga sila igo lang niabag sa LTO-7 sa pagpanakop niadtong abusadong mga driver sa probinsya, ingon man pagdakop niadtong mga tawo nga magsakay motorsiklo nga way dukomento nga sagad gamiton sa mga kriminal.
Apan tungod sa mao nga kamanduan maluagluagan na unya ang mga pulis labi na sa isla sa Sugbo. (Guam P. Logroño)