KRITIKAL ang kahimtang sa usa lalaki human nahulog sa gisakyang dyip niadtong Lunes mga alas 9:00 sa gabii didto sa lungsod sa Villanueva, Misamis Oriental.
Giila ang biktima nga mao si Rodel Nacua, 19, taga Barangay Luna, lungsod sa Claveria, Misamis Oriental.
Nasayran nga sakay ang biktima sa atop nga bahin sa dyip nga Claveria Liner aron mag-deliver og utanon sa Agora Landing Area dihang natigayon ang aksidente.
Apan paghidangat sa lungsod sa Villanueva, kalit lang kining misangit sa usa ka wire hinungdan sa pagkaguyod niini ug pagkahulog gikan sa dyip.
Pipila pa ka metro ang kalay-on usa mihunong ang driver sa dyip dihang namatikdan nga adunay nahulog gikan sa atop sa dyip.
Gipasalamatan nga wala sab sakyanan nga nakasunod niadtong tungora ug wala kini maligsan.
Si Nacua, nakaangkon og grabeng bun-og sa lawas ug lain-laing pangos, kinsa gidali pagdala sa driver sa Northern Mindanao Medical Center ning siyudad sa Cagayan de Oro.
Kritikal ang kahimtang sa biktima human dili kini pakabakod ning panahona. Giingong wala sab mabasol niini labina purely aksidente ang hitabo.