ANG Davao City Police Office (DCPO) naniid karon sa mga tawo nga posibleng may kalambigitan sa paggama og peke nga credit card dinhi sa siyudad sa Davao.

Ang pagpaniid gihimo sa kapulisan human nasikop ang usa ka negosyante nga si Gilbert (bansagon gitago sa Superbalita, 37, ulitawo ug nagpuyo sa San Juan, Metro Manila.

Updates on President Benigno Aquino III's presidency

Base sa blotter sa San Pedro Police Station, ang suspetsado gisikop didto sa Hannah's Pawnshop nga nahimutang sa dalang Legaspi sa alas 3:00 sa hapon niadtong Agosto 20.

Si Gilbert giingon nga migamit og nagkalain-laing credit cards sa iyang pagpalit og mga alahas sa maong pawnshop.

Ang suspetsado, suma sa sales lady nga si Evelyn Medrano, mao ang tawo nga mipalit sa ilang pawnshop og gold ring nga nagkantidad og P9,000 gamit ang credit card.

Si Medrano nagsulti sa kapulisan nga niadtong Agosto 20 mibalik ang suspetsado ug mipalit na sab og laing mga alahas gamit ang laing credit card.

Nahibulong ang sales lady dihang iyang nasuta nga ang credit card ug ang gipakita nga identification card nagbatun man sa pangalan ni Edwin dela Cruz.

Tungod sa maong hitabo, nangayo sila og police assistance apan sa wa pa miabot ang kapulisan nahatag na sa suspetsado ang credit card sa iyang kauban kinsa daling miikyas palayo sa maong pawnshop.

Si Gilbert gidala sa San Pedro Police Station apan gibuhian sab dayon human nasuta nga way igong ebidensiya batok kaniya. Suspek dunay abogado.

Ang maong hitabo maoy nakapaaghat karon sa kapulisan nga maniid tungod kay nagtuo sila nga dunay mga tawo nga nakahimo sa paglapas sa Republic Act 8484 kun Access Device Regulation Act, sigun ni DCPO Director Rene Aspera sa SuperBalita. (AD)