DUHA ka mga tawo ang nangaangol sa pag-atake sa mga armado alas 8:00 sa gabii niadtong Lunes didto sa probinsiya sa Maguindanao.

Nailhan sa kapulisan ang mga biktima nga sila si Sabata Calid, 40, minyo ug iyang pag-umangkon nga si Nasser Ampulod, ug mga molupyo sa Barangay Poblacion, Sharief Aguak sa maong probinsiya.

Updates on President Benigno Aquino III's presidency

Gibutyag ni Maguindanao Police Provincial Director Marcelo Pintac nga samtang nanihapon ang mga biktima, kalit lamang mibutho ang wala mailhing mga armadong lalaki ug gipamusil sila gamit ang M16 Armalite rifles.

Dali sab nga misibat ang mga suspetsado sa diha nga ilang namatikdan nga niresponde ang mga sundalo ug kapulisan.

Grabe ang mga igo sa lawas ni Calid, kinsa gidala dayon sa iyang pamilya sa Cotabato Regional and Medical Center sa siyudad sa Cotabato.

Samtang si Ampulod, nahiagum lang og tapsing nga samad sa iyang bukton ug luwas na sa makuyaw nga kahimtang.

Si Ampulod nagsulti nga wala niya mailhi ang mga suspetsado gumikan kay ngitngit sa gawas sa ilang bay ug kalit kaayo ang hitabo.

Naningkamot karon ang mga otoridad sa pagsusi aron ilang mailhan ang mga suspek ug masikop. (Edgardo Fuerzas)