USA ka lalaki napalgang patay nga naglutaw sa usa ka kanal human gitigbas didto sa lungsod sa Maco, Comval Province, Lunes sa buntag.
Ang biktima nailhan nga mao si Peter Talacay, 47, ug molupyo sa Sityo Tacunan, Barangay Lumatab, lungsod sa Maco.
Sa report gikan sa Comval Province Police Provincial Office, nasayran nga pasado alas 6:00 sa buntag napalgan sa iyang kaipon nga si Erlinda Balasaba ang biktima nga wa nay kinabuhi nga naglutaw sa usa ka kanal sa may Sityo Tagunan sa maong barangay.
Ang biktima nahiagum og samad tinigbasan sa kalawasan hinungdan sa iyang kamatayon.
Ang suspek nailhan nga usa ka Napoleon Timagos, ug silingan lamang sa biktima. Sa inisyal nga imbestigasyon sa mga otoridad, nasuta nga una pa napalgang patay ang biktima, nakigsumbagay siya sa suspek niadtong Dominggo didto sa maong lugar.
Human sa ilang away, nisulay pa pag-uli ang biktima, apan wa na kaabot buhi sa ilang balay ug nahulog sa kanal human nga gituohang gitigbas sa suspek.
Ang suspek dali sab nga misibat padulong sa wa matino nga lugar human sa hitabo. Kapulisan sa lungsod sa Maco mihimo na karon og dugang imbestigasyon sa hitabo. (Marvin Pineda)