MAKOMPLETO na’g pangabot dinhi sa Sugbo karong adlawa ang mga langyaw nga moasdang alang sa “Philippines vs. the World” boxing promotion nga gikatakda karong Sabado sa Waterfront Hotel sa Lahug, Cebu City.
Kagahapon unang miabot si Indonesian PABA champ Sofyan Effendi, kinsa makigharong kang kanhi world champion Florante “Little Pasquiao” Condes sa undercard sa promosyon nga gitambayayungan pagpasigda sa ABS-CBN ug ALA Promotions.
Nagkanayon si ALA Promotions vice president Dennis Cañete nga sunodsunod nga mangabot sila si Mexican Alejandro Barrera, Mexican Pepino Cuevas Jr. ug Korean Jin Man Jeuna.
Si Barrera, kinsa ig-agaw ni Mexican legend Marco Antonio Barrera, makigharong kang Rey “Boom-Boom” Bautista sa main event, si Cuevas makigbatok kang Jimrex Jaca samtang si Jin Man makigkontra kang Milan “Melinyo” Melindo.
Ang mga Pinoy sa promosyon ningpadayag na sa ilang kaandam alang sa pagprotekta sa dungog sa nasod gikan sa pagpangatak sa langyawng mga boksidor.
Apan labing seguro, andam sab gyud kaayo ang mga langyaw alang sa ilang tagsatagsa ka tahas hinungdan nga seguradong saktong binukbokay ang masaksihan.
Importante kaayo kining awaya alang kang Bautista kay usa kini sa iyang mga agianan aron mahibalik ang iyang kanhi dungog nga nabulingan dihang nakaangkon siya og duha ka mga pilde.
Hasta sab kang Jaca, kinsa nanghinaot sab nga makabalik siya sa taas.
Ugma sa udto ipahigayon ang press conference sa Waterfront unya inig ka Biyernes mao ang official weigh-in.
Alang sa mga tiket, mahimong motawag sa ALA Promotions (032-2364611), ALA Gym-Banilad Town Center (4162011). Bisaya Ispisyal Ayala (032-2312676), USA Sports Ayala (4121069) ug Waterfront (230-6888).