Mariano E Manus, Sr.
Basak-Iba, Lapu-Lapu City
“MAR, ang imong trabaho ugma pang-letra sa mga panapton.” Nagkanayon ang among superbisor samtang nagkapuliki ko sa pag-imprinta. “Duna ka bay mga lettering brush?”
“Duna, Sir, apan atua sa Opon. Kon mao, di una ko ron mo-obertaym kay mopauli ko aron pagkuha niadto.”
“Pag-ober lang hangtod alas sayis.”
Editor ko sa Bahing Binisaya sa Allied Mining Magazine nga nagpatik sa binulang magasin ug sinemanang newsletter.
Sa paghagtok sa alas singko sa hapon nanghugas na ko sa makina sa imprinta ug pagka human migawas ko aron mopauli. Paghiabot ko sa main gate mao gayuy pag-abot sa St. Christopher 17 ug mihunong kini. Samtang nagpaabot og mga pasahero nagkalingaw ang drayber pagpaniltil sa ilawom sa bus kay nag-ayo sa brek nga mihagtos. Mihunat kog dagan aaron pagsakay niini. Apan nabaraw ko kay dihay misignit sa akong kamot. Si Fredmon.
“Dili pa kana molarga, Bay Mar. nag-ayo pa ang drayber sa brek,” ni Fredmon nga nagtingsi. “Tana, maghapi-hapi una ta. Nakadaog ko sa numero sa swertres nga imong gihatag ug akong gi-minten.”
“Haaa!” Nahitiurok ko. Ang maong numero 1-0-7 nga akong nadamgohan apan gipul-an kog pinusta kay wa gyud mogawas, akong gihatag kang Fredmon. Migawas na diay.
Tungod kay nag-ayom-ayom pa sa brek ang drayber sa Christopher 17 miuban ko kang Fredmon. Nangaon kami ug nag-inom. Igong nakayarok kog usa ka baso milarga ang bus. Naglanog-lanog ang akong singgit nga mihunat paglutos, apan wan a kini mohunong.
“Nganong mopauli man ka nga Miyerkules pa man ron? Di ba Sabado ma’y atong ipamauli?” ni Fredmon nga nahibulong.
“Kinahanglan kong mopauli kay magkuhag mga brutsang ig-leletra. Pangletra sa panapton ang trabaho ko ugma,” matod ko nga nanakla.
“Lettering brush?” ni Fredmon nga miipis sa sulod sa botelyang lapad, “Kana ra diay? Ayaw kaguol. Tuay daghan sa among bodega. Manayo ta ugma kay papilion tika.” Gitunol niya kanako ang iyang inipis sa baso.
Nianang pagka ugma sayo kong miadto sa trabahoan. Sa akong pag-abot sa plasa sa Safety Dept. diin nahimutang sa ikaduhang andana ang Publication Dept. nga akong gitrabahoan nahasiga ang akong mga mata. Nagpasad ang mga stretcher nga nagkadugo.
“Sir, duna bay disgrasya sa underground?” sukot ko kang Mr. Berador nga boss ni Fredmon nga bodegero sa Safety Dept.
“Wala dinhi. Didto sa kimba sa Manipis nahitabo ang disgrasya. Nahulog ang St. Christopher 17 kay depektuso ang brek. Walay nabuhi sa mga pasahero, lakip na ang drayber ug konduktor.” Miasoy si Mr. Berador.
Wala ko kapugngi ang pagpangurog. Wala madugay miabot si Fredmon ug gipapili ko sa daghang mga brutsa nga iyang dala. Sa hilom nagpasalamat ako kay siya ang nakaluwas kanako sa ngilit sa bung-aw sa kamatayon. (Katapusan)