AUDITORIUM sa Cebu City Medical Center (CCMC) ipagamit aron sa pag-accommodate sa tanang mga pasyente nga nataptan sa dengue fever.
Kini maoy kamanduan ni Mayor Michael Rama kon gikinahanglan nga i-expand ang pediatric ward nga nahimutang sa ikatulong andana sa tambalanan aron mapatuman ang 1 patient- 1 bed ratio.
Ingon man pagbutang og dugang mga higdaanan sa pediatric ward aron di na magsawo ang duha ngadto sa tulo ka mga pasyente sa usa ka hospital bed.
Dugang tulo ka mga higdaanan ang gibutang niadtong miaging adlaw agi og puno sa 35 na ka mga higdaanan, ilabi na nga dili lang dengue patient ang mo-ukopar sa ward lakip na niadtong nag-antos sa gastroenteritis, pneumonia ug uban pang mga sakit.
Base sa talaan sa gidaghanon sa dengue patients nga nadangat niadtong miaging adlaw, moabot na ngadto sa 22 ang na-confine gikan sa 27 ka mga pasyente niadtong Sabado.
Nipasalig si Rama ngadto sa publiko nga padayon nga mohatag ang siyudad og libre nga laboratory test sa tanang dengue suspected patients ingon man sa complete blood count (CBC).
“Those who will be confirmed to have dengue will also get free treatment at the city hospital,” sumala pa ni Rama.
Ang hepe sa CCMC nga si Dr. Myrna Go nihangyo sa mayor nga kadugangan ang pundo sanglit nahutdan na ang tambalanan sa supply sa tambal ug antibiotics.
Hinungdan nga ang mga pasyente gikinahanglan nga mopalit sa ilang kaugalingong supply ilabi na sa IV fluids o dextrose ingon man kadtong pasyente nga naigo na sa komplikasyon ug gikinahanglan ang antibiotics. (FVQ)