DUNAY mga palpak ang mga pulis sa ilang pagpahigayon og rescue mission sa mga hostage nga turista nga Chinese nationals.
Mao kini ang nakit-an sa duha ka police officials ug usa ka magbabalaod sa Sugbo.
Sila si Cebu City Police Director Patrocinio Comendador, Cebu Provincial Police Director Erson Digal ingon man si Kong. Luigi Quisumbing sa 6th district ug sakop sa House committee on public order and safety, nagkahiusa sa ilang obserbasyon nga dunay mga sayop ug kakuwang ang mga pulis nga nipahigayon sa rescue operation.
Hinuon, gitataw ni Police Regional Office (PRO-7) Director Ager Ontog Jr. nga dunay katakos ang kapulisan dinhi sa pagtubag sa hostage crisis nga sama sa nasugatan sa kapulisan sa kaulohan, diin siyam ka mga kinabuhi ang nangakalas.
Si Comendador nitumbok sa iyang nakit-ang mga kakuwang ug sayop sa kapulisan.
Kini naglakip sa: kakuwang sa basic equipment sama sa tear gas mask nga maoy hinungdan nga naglisod sa pagsud ang mga pulis dihang ilang gilabay og tear gas ang tourist bus; way flashlights; di mao nga bullet proof vest nga alang lang sa mugbo nga kalibreng armas, di alang sa high-powered sama sa armalite; kapakyas sa pag-disable sa TV monitor sa bus; kakuwang sa plano; kakuwang sa koordinasyon sa mga ahensya nga nalambigit sa krisis; kakuwang sa initiative sa negotiator ug kapakyas sa pag-isolate sa psychological nga aspeto sa operasyon.
Lakip sa iyang nakit-an nga palpak mao ang crowd control kay nakatapok ang mga usisero kay gigamitan lang og yellow police lines inay puthaw nga pangbarikada.
Alang usab kaniya nisamot kainit ang sitwasyon human dakpa sa mga pulis si SPO2 Gregorio Mendoza, igsuon sa suspek. Human dakpa si Gregorio, nadungog og sunod ang mga buto sa armas gikan sa tourist bus.
Si Mendoza nag-monitor diay sa police operation pinaagi sa telebisyon ug radio.
Apan giklaro ni Comendador nga wa niya hukmi ang police operation aron sa pagluwas sa mga bihag gikan kang Sr. Insp. Rolando Mendoza kay wa siya didto.
Samtang si Ontog niingon nga ang mga sakop sa Special Weapons and Tactics (Swat) sa Cebu City Police Office (CCPO) makahimo sa pagtubag sa susamang sitwasyon hinungdan nga way angay nga ika-alarma niini ang publiko.
Hinuon gipasabot niini nga di lang siya mohusgar sa aksyon sa mga pulis sa kauluhan, apan sa iyang kinatibuk-ang paglantaw sa hostage crisis panagsa lang kini mahitabo.
Subay niini si Ontog nipahigayon og inspection kagahapon sa hapon sa mga sakop sa Swat Team sa CCPO isip kabahin sa ilang paglantaw sa mga kagamitan sa units nga magmit sa ilang pag-respondi sa bisan unsang panghitabo.
Gipadayag niini ang iyang katagbaw sa gipakitang Performance sa SWAT sa gipahigayong hostage taking simulation sa CCPO, apan giklaro niya nga palambuon pa nila ang ubang equipment.
Samtang si Comendador nipasabot nga usa sa mga lantawon sa pagtubag sa hostage crisis mao ang kaluwasan sa gipangbihag, pulis, sibilyan ug hostage-taker.
Gipadayag niya nga mamahimong paabton og buntag ang negosasyon hangtod nga kapuyon ang hostage taker.
Giklaro niya nga ang CCPO dunay igong katakos sa pagtubag niini ingon man mas equipped pa og kagamitan ang mga pulis dinhi kay sa ilang mga kauban sa kaulohan.
Si Sr. Supt. Ramon Melvin Buenafe, ang in-coming nga director sa CCPO, nagkanayon nga daghan silag nakat-unan sa maong hostage crisis hinungdan nga ilang gipang-lista ang ubang mga lapso nga nahimo sa mga pulis didto.
Sa iyang bahin, si Sr. Supt. Erson Digal, director sa kapulisan sa lalawigan sa Sugbo, nasagmuyo sa maong insidente.
Matod ni Digal nga ang mga pulis sa kaulohan kuwang og mga gamit, way crowd control ug way gas mack.
Matod pa niya nga wake-up call sa kadagkuan sa PNP ang hitabo ug angay nga palambuon pa og maayo ang ilang mga ikipo nga magamit sa bisan unsang mga crisis nga ilang masugatan.
Si Quisumbing niingon nga klaro kaayong kuwang og training ang mga pulis.
“We should have highly-trained team to handle such situation. We need more training and more equipment,” pasabot ni Quisumbing.
Samtang, si Jenny Franco sa Travel Vision kinsa presidente sa National Association of Independent Travel Agencies (Naitas) dinhi sa rehiyon 7 nipadayag nga dakog epekto sa turismo ang maong insidente.
Ang kagamhanan sa Hong Kong niisyu na og travel van sa ilang mga lumolupyo dinhi sa Pilipinas.
Kadtong nia na dinhi ilang gipahimangnoan nga naa sa dakong kakuyaw ug mag-amping og maayo samtang nia pa sa nasod.