GIUNAY ra pagpatay sa iyang pag-umangkon ang usa ka mag-uuma kinsa nakaplagang gilubong duol sa balay sa iyang igsuon didto Purok 9, Barangay Sirib, distrito sa Calinan, siyudad sa Davao niadtong Dominggo.
Human gipatay si Alberto Dulay, hamtong ang pangidaron, nagpuyo sa maong lugar, wa na nagpakita ang iyang pag-umangkon nga si Ariel Carillo Dulay.
Ang pagkahanaw ni Ariel maoy nakapaduda sa kapulisan nga duna siyay kalambigitan sa krimen mao nga gihimo dayon ang makuting imbestigasyon sa Calinan Police Station.
Base sa progress report sa kapulisan, nasuta nga dunay kasuko ang suspetsado ngadto sa namatay human gitigbas sa nauwahi ang inahan sa suspetsado niadtong Marso 28, 1998.
Ang inahan sa suspek mao si Marilou Carillo Dulay kinsa mipasaka og kasong frustrated murder ngadto sa korte batok kang Alberto.
Si Alberto nasentensiyahan sa iyang salaod apan nakagawas sa Davao City Jail human gihatagan og parole sa gobyerno.
Dihang nakagawas na sa bilanguan si Alberto, suma sa imbestigasyon, mibalik siya sa ilang lugar sa pagtuo nga wa magdumot kaniya ang iyang pag-umangkon.
Sukad mahiabot sa ilang lugar si Alberto, kanunay siyang gihulga sa suspetsado ug gisundan ang iyang mga lakaw mao nga nahiusa ang pagtuo sa mga otoridad nga siya ang nagpatay sa biktima.
Base sa pasiunang imbestigasyon sa kapulisan, ang biktima nakaplagan mga alas 12:00 sa udto pinaagi sa iyang anak nga si Arturo Dulay.
Si Arturo, dihang nadiskubrehan ang nahitabo sa iyang amahan, nangayo dayon og police assistance aron ugkaton ang patay'ng lawas ni Alberto.
Human nadawat sa kapulisan sa Calinan, miresponde dayon si Sahidain aron imbestigahan ang maong hitabo.
Matud ni Sahidain nga ang biktima gilubong mga 110 sentimetro ang gilawmon duol sa balay sa iyang igsuon nga si Rudy Dulay.
Sa gihimong imbestigasyon sa Scene of the Crime Operatives (Soco), ang biktima nakabaton og tulo ka mga samad sa iyang dughan, tulo sa liog ug duha sa iyang tuong braso. (AD)