STA. CRUZ, Davao del Sur -- Usa ka 30-anyos nga lalaki nasikop sa kapulisan sa gihimong buy-bust operation alas 6 sa milabay nga gabii.
Ang operasyon gilusad sa kapulisan sa Sta. Cruz Police Station gipangulohan ni Chief Inspector Edito Mandi didto sa Sityo Lawis, Barangay Bato.
Nilampos ang kapulisan pagsikop sa suspek nga si Jainal Benzal Usman, minyo ug molupyo sa lugar.
Asoy ni Mandi, nasiplatan sa ilang impormante ang suspek nga nagpayuhot og ilegal nga druga sa lugar hinungdan nga dali nilang giplano ang pagsikpaw kaniya.
Nigamit ang mga otoridad og marked money nga kantidad P500 nga maoy gipaon sa paglit-ag kang Usman.
Nakuha gikan sa posisyon sa suspek ang duha ka mga gagmay'ng sachet sa druga.
Ang maong mga sachet himuong ebidensiya sa kapulisan sa pagpasaka og kasong paglapas sa Republic Act 9165 o mas nailhang Comprehensive Anti-dangerous Drugs Act of 2002.
Gipasalig ni Mandi nga ilang sumpuon ang pagkuyanap og gidiling druga sa ilang area of responsibility. (Orlando Dinoy)