USA ka negusiyante ang gipusil, patay sa alas 2:20 sa hapon niadtong Martes didto sa siyudad sa Tacurong.
Giila sa kapulisan ang biktima nga mao si Wahid Guiafar, 49, minyo, buy and sell trader ug molupyo sa Barangay New Isabela sa maong siyudad.
Sigun sa nahagpat nga taho gikan sa Sultan Kudarat Police Provincial Office nga samtang migawas ang biktima sa iyang sakyanan sa Barangay Poblacion uban ang iyang duha ka mga anak ug asawa, kalit silang giduol sa duha ka wala mailhing tawo ug gipusil gamit ang kalibre .45 nga pistola.
Patay gilayon si Guiafar nga naigo sa iyang ulo, dughan ug likod nga bahin sa lawas samtang ang mga mamumuno dali nga mi-eskapo sakay sa XRM nga motorsiklo.
Matud ni Sumilla, asawa sa biktima, nga wala siya makaila sa mga suspetsado gumikan kay pulos sila nagsul-ob og helmet unya kalit sab kaayo ang hitabo.
Gitahasan na ni Sultan Kudarat Police Provincial Director SSupt. Teng Tucao Mamalinta si Tacurong City Police Chief Supt. Alfredo Dangani nga tutukan pag-ayo ang imbestigasyon sa maong hitabo. (Edgardo Fuerzas)