WA NAY nahimo ang mga doktor didto sa Southern Philippines Medical Center (SPMC) sa pagluwas sa kinabuhi sa usa ka drayber sa habal-habal nga lumolupyo sa lungsod sa Matanao, Davao del Sur.
Samtang nagbiyahe didto sa provincial road sa Upper Malinao, lungsod sa Padada, Davao del Sur, naaksidente ang biktima, banda alas 9:30 sa miaging gabii.
Ang traffic section sa kapulisan nga nitubag sa alarma nag-ila sa drayber nga mao si Joven Aktoy, 37, minyo ug taga Barangay La Suerte, Matanao.
Sa pasiuna nga imbestigasyon gikataho ni PO2 Danny Mualong nga angkas ni Aktoy sa iyang kolor pula nga Yamaha STX motorsiklo, nagbaton sa plakang MH-1521, ang duha ka mga ig-agaw nga nailhang sila si Francisco, hingkod ang pangedaron; Ronilo, 35, pulos minyo; ug Ruby Jane Brosas, 11 anyos, lumolupyo sa Barangay
Balasinon nga silingang lungsod sa Sulop, Davao del Sur.
Sumala ni Mualong nga adunay gisab-it nga duha ka bukag sa kilid sa motorsiklo sa mga biktima samtang gikasugat nila ang laing Lifan motorsiklo nga kolor blue, way plaka, way headlight ug gimaneho ni Frian Castillon, 28 anyos, minyo ug taga didto ra sab sa maong lugar.
Mga biktima nangalagpot ug nalimbuwad sa dihang nagkasaghiray sa kilid ang ilang mga motor.
Gipangdala sa bay tambalanan ang duha ka mga drayber ingon man ang mga angkas sa Yamaha STX.
Si Aktoy, nga na-grabehan niadtong tungura gibalhin sa Southern Philippines Medical Center sa dakbayan sa Davao apan gipauling patay na human nakabsan sa kinabuhi pipila ka oras human gidapatan og tambal sa mga doktor.
Gikostudiya na sa kapulisan ang mga motorsiklo nga labihan kaguba. Mihimo pa og dugang imbestigasyon ang kapulisan sa maong hitabo. (Dondon Dinoy)