DUHA ka mga lalaki nadakpan sa kapulisan tungod sa gipagawas nga orden de aresto sa korte sa managlahing giatubang nga mga kaso niadtong Martes.

Unang nadakpan mao ang usa ka mananggiti nga si Rey Mingo, 41, minyo, ug lumolupyo sa Datoc Compound sa dakbayan sa Digos.

Post your reaction on the Manila hostage crisis

Si Mingo nadakpan nila SPO3 Paulino Cabrillo, PO2 Arnel Palancos ug PO1 Rogel Cambarijan basi sa warrant of arrest nga giisyu sa Regional Regional Trial Court (RTC) 11th Judicial Region tungod sa tulo ka mga kasong "frustrated homecide" nga nakadoket sa criminal case number 92 (10) 93 (10) ug 94 (10).

Hinuon, wa nihatag ang DCPO og dugang detalye kon kinsa ang tulo ka mga biktimang nireklamo nga buot silang patyon sa suspek.

Samtang sa pikas nga bahin, dakpan sab sa kapulisan ang laing lalaki didto sa Sta. Maria, Davao del Sur kinsa nag-atubang sa kasong murder sa mao gihapong adlaw.

Ang mag-uumang si Nole Caluyan, 27, minyo, kinsa lumolupyo sa Sitio Batsol, Barangay Basiawan, Sta. Maria, nadakpan human niguwa ang warrant of arrest nga gilagdaan ni Judge Albert Axalan sa RTC Branch 20.

Giatubang niya ang criminal case number 201 (2010) ug walay rekomenda nga piyansa alang sa temporaryo niyang kagawasan. (Dondon Dinoy)