NAGPAKATAP og 43 puntos ang higanteng si Junmar Fajardo aron aswaton ang University of Cebu (UC) Webmasters ngadto sa makutas nga kadaugan batok sa University of Southern Philippines Foundation (USPF) Panthers, 86-79, sa main game niadtong Martes sa Cebu Schools Athletic Foundation Inc. (Cesafi) college division sa Cebu Coliseum.

Ang Webmasters ni coach Rhoel Gomez ningsaka sa 5-1 nga rekord samtang ang Panthers ni coach Raul Latonio wala pa’y daog sulod sa unom ka mga duwa.

Updates on President Benigno Aquino III's presidency

Basi sa rekord sa duha ka mga kampo, gilauman unta nga modominar gyud ang Webmasters ning duwaa apan puwerteng lahia sa nahitabo – naglisod gyud ang Webmasters gikan sa sinugdanan hangtod sa katapusan.

Sa 4th quarter, nidominar na gyud si Fajardo sa ilawom nga bahin ug nimugna kini’g sunodsunod nga puntos aron hatagan ang Webmasters og 72-64 nga labaw sa nahabiling kapin sa 6:00 ka minutos.

Ang kabangis ni Fajardo sa ilawom gitubag sa mga jumpshot ni Panthers forward Fritz Dajalos, kinsa nimugna sab og sunodsunod nga puntos aron tablahon ang duwa, 72-72, sa nahabiling 3:20 minutos.

Si Fajardo nakigkumboya nila ni Edward Pao ug Lugi Bercede aron pukawon ang opensa sa Webmasters ug tuod man, nakaposte sila’g 82-76 nga labaw sa nahabiling 57 segundos.

Ningsuway pag sa pagpanghudlat ang Panthers apan wala na sila nakalahutay kay nahikawan na sila sa oras.

Sa high school division, gipanglampornas sa defending champion Cebu Institute of Technology (CIT) Wildkittens ang Don Bosco Technological Center (DBTC) Baby Greywolves.