HUMAN sa dugoong hostage drama sa Quirino Grandstand nga mikalas gyud og siyam ka mga kinabuhi sa mga turistang Hongkong nationals, misibaw karon ang pangutana kon si kinsa man ang mabasol sa maong trahedya?

Dinhi unang mogawas nga kontrabida ang desperadong pulis nga si Senior  Inspector Rolando del Rosario Mendoza nga tungod sa sobrang pagmahal sa iyang panerbisyo ang dili makadawat sa iyang “dismissal from service with perpetual and absolute disqualification from any government office and revocation of retirement benefits” gikan sa buhatan sa Ombudsman tungod sa kasong extortion and grave threats.

Updates on President Benigno Aquino III's presidency

Sa nasayran nga si Mendoza usa ka kanhi awardee sa Jaycees International isip usa sa Ten Outstanding Policeman in the Philippines niadtong tuig 1986. Kini human nakasakmit sa mga gipayuhot nga mga kahon nga adunay minilyon nga kantidad nga gitouhang iya sa mibiyang Presidenteng diktador nga si Ferdinand Marcos ug kini iyang giuli nga walay kuwang. Mao nga ang iyang pamilya nagtuo nga kon tinud-anay pang mangwartahay ang maong pulis, nganong wa naman lang niya kini isibat kaysa managinot sa 20 mil ka pesos nga gipasangil sa ilang dinakpan sa illegal drug possession? Unya human mapasakai sa kaso ang gilabay pa gyud sa Autonomous Region for Muslim Mindanao dayon pagawas sa silot nga gipahamtang.

 

Sunod nga gibasul ang kapulisan nga maoy mipahigayon sa rescue nga wala nagkadimao kay migawas nga sobra sa: (1) pagkawalay sistema nga gipatuman ang ground commander (2) mga negosyador nga walay diskarte; (3) mga Swat nga walay plano ug tira pasagad ug (4) walay ensaktong kagamitan kay hastang ilang tear gas ang mikagar kay expired na diay intawon.

Wala sab makaipsot sa pagmahay ang mga sakop sa media nga mihimo og live coverage sa maong hostage drama nga gituohan nga maoy nagsilbeng nakapaboridog samot utok ni Rolando sa dihang iyang nakita ang pagsikop sa iyang igsoong pulis nga si SPO4 Gregorio Mendoza tungod kay nagmonitor man siya sa tv og radyo diha sa sulod sa bus.

Kini produkto sab gihapon sa sobrang kagustuhan sa mga reporters nga magpalabwanay sa paghatag og impormasyon.

Samtang tinuod nga nakahatag kining maong coverage og kadaut, apan og dili pa usab yabag ug hangol og pasikat ang mga opisyal sa kapulisan, mamahimo man unta nilang limitahan ang gihimo sa mga tigbalita.

Ang mga Griyego sa karaang panahon adunay gipatik sa ilang Templo sa Delphi nga “medan agan” (nothing in excess).

Ang nahitabo kang Inspector Rolando Mendoza og ang gidangatan sa iyang mga biktima maghatag unta kanato og leksyon. Apil na ang panginahanglan sa pagpa-eksamin sa utok sa tanang mga sundawo ug sakop sa kapulisan nga karon kasamtangang nangatungdanan.

Kay sa higayung sila ang maburyong, ang mismong pusil nga angay untang iserbisyo sa pagpanalipod sa katawhan ang mao ra usa’y mounay sa pagpatay sa gipang-alagaran.