Editoryal: Nganong basulon man ang media?

USA sa gibasol sa dakong kapalpakan nga ahimo sa kapulisan kalabot sa hostage-taking didto atubangan sa Quirino Grandstand sa kaulohan mao ang live coverage sa media.

Gitumbok, atol sa maong hitabo, nga sa dihang nakita ni hostage-taker Sr. Insp. Rolando Mendoza nga gidakop ug gimaltrato sa mga pulis nga nagpalibot kaniya ang iyang igsuon, didto nisurok ang iyang dugo ug nadungog dayon ang mga buto-buto sa pistola sulod sa tourist bus nga iyang gikomander.

Nagtuo ang mga tinugyanan sa balaod nga mao kadtong higayona nga gipamusil ug gipamatay ni Mendoza ang mga gipang-hostage bunga sa iyang kalagot.

Ning puntoha ang live coverage sa media maoy ilang girason nga nakatampo sa ilang kapalpakan kay kon wa pa kuno makita ni Mendoza ang panghitabo hayan mahataas pa unta ang negusasyon.

Si Kongresista Luigi Quisumbing sa sixto distrito daling mituo sa maong rason ug mihatag gilayon og aksyon. Mipalabang dayon siya og balaodnon nga kinahanglan i-ban ang live coverage sa media atol sa susamang sitwasyon.

Buot ipasabot ni Quisumbing nga itago o ilimbong na lang sa publiko bisan unsay buhaton sa kapulisan ngadto sa hostage taker? O kaha aron dili mabulgar sa publiko ang kahiwian o pag-abuso nga mahimo unya sa kapulisan?

Ang live coverage sa media mahimo nga acces tali sa hostage taker ug sa mga tinugyanan sa balaod diin sila makapadayon sa ilang negusasyon. Kini angay unta nga kapahimuslan sa kapulisan aron sila molampos sa ilang katuyoan.

So, nganong i-ban man ang live coverage sa media?

Sa laktod nga pagkasulti, ang live coverage wa makapasurok sa dugo ni Mendoza kon dili ang pagmaltrato sa iyang igsuon maoy numero unong rason nganong nisamot ang iyang pagka-aburido.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph