DI lang ang kagamhanan sa Hong Kong ang niisyu sa travel ban sa nasod kay ang Indonesia, Thailand, Nepal, Iran, Pakistan ug Russia niluwat sab sa travel ban gumikan sa nahitabong hostage-taking sa kaulohan.

Gumikan niini, ang presidente sa National Association of Independent Travel Agencies Cebu (Naitas) Jenny Franco nangayo og pakitabang sa Department of Tourism (DOT) sa kabalaka nga ang trahedya sa kaulohan moresulta pagkadaot sa imahe sa nasud ilabi na sa turismo.

Updates on President Benigno Aquino III's presidency

“This is not just a crisis in Manila, but a national crisis,” dason ni Franco.

Base sa talaan sa DOT-7 nga gikan sa Enero ngadto na sa Hunyo moabot ngadto sa kapin sa 13,600 ka mga turista nga gikan sa Hong Kong niduaw sa Sugbo.

Sa susamang mga buwan kapin sa 22,200 ka mga langyaw ang nagikan sa nasud sa Tsina nga gihulagway nga ika-upat nga labing daghang turista nga moduaw sa Sugbo.

Napanglantawan ni Franco nga aduna unyay mokanselar sa mga booking niadtong mga turista nga gikatakda nga moduaw sa Sugbo sugod karong semanaha.

Ang acting regional director sa DOT7 Rowena Lou Montecillo nanghinaot nga sa di madugay libkason sa Hong Kong government ang maong travel ban sanglit ang hostage-crisis usa lang ka isolated case.

Sa sayo pa, dali nga miluwat ang Hong Kong authorities sa black alert nga nagpahimangno sa ilang mga residente sa di pagduaw sa Pilipinas human nga walo sa ilang mga national napatay sa maduguong hostage crisis niadtong Lunes sa gabii.

Samtang lakip ang dakbayan sa Lapu-Lapu naguol sa gipagawas nga travel van sa Hongkong diri sa Pilipinas.

Si Rolando Duero, executive officer ni Mayor Paz Radaza, niingon nga nasubo sila sa maong hitabo.

Matod niya nga gawas sa pagkamatay sa mga turista, nasubo sila tungod kay apektado usab unya ang turismo sa Lapu-lapu City nga maoy usa sa mga tourist destination dinhi sa Sugbo.

Nagkanayon si Duero nga bisan og layo ra ang Lapu-Lapu sa Manila apan tungod sa travel advisory di malikayan nga maapektohan ang gidaghanon sa mga turista nga moduaw sa maong siyudad.

Apan gipasalig ni Duero nga ang mga turista luwas sa ilang pagbisita sa Lapu-Lapu, samtang aduna usab silay mga sakop sa Swat nga saktog training ug kompleto og kahimanan nga ang uban niini gikan pa sa gawas sa nasod.

Ang tigpamaba sa Lapu-Lapu City Hall nga si Eric Monsanto niingon nga usa sa mga kahimanan sa ilang Swat nga wa sa ubang mga SWAT mao ang night vision goggles.