DAGHAN karon ang nagtoo nga ning panahona, ang mga pobre mosamot kapobree samtang ang mga adunahan mosamot ka sapian. Kini ang nahimong sangputanan karon ning mitumaw nga reklamo sa mga pobre ug makalolooy nga mga taxi drivers sa gihimong sobrang abuso niining ilang pipila ka operators.
Wala na makapugong kining mga drivers sa taxi nga moreklamo sa atong mga otoridad sama sa Konseho sa dakbayan kung nganong pugson sila sa ilang mga taxi operators nga didto gayud sa ilang garahe mag refuel labi na kadtong LPG feed taxi units. Ang naka pait kay sobra sa P6.00 ngadto na sa P8.00 kada litro ang patong niini.
Pagka makalolooy intawon kining mga taxi drivers nga nagsalig lang intawon sa ginagmayng kita sa pagmaneho aron lamang mabuhi ang ilang pamilya. Pila raman intawon pud ang kita sa pagdrive sa taxi, maayo nalang kung moginansiya ang usa ka driver sa P250.00 ngadto na sa P500.00 matag adlaw.Ang uban taxi drivers mangyawat nalang ug taya sa swertres basin moigo ug makapalit ug bugas alang sa pamilya o manguyab nalang intawon ug mga matrona agig sideline tungod pud lagi sa kawad-on.
Nagpakita nga walay mga kaulaw ug konsensiya kining pipila ka taxi operators dinhi sa siyudad.Grabe gayud ang pagpahimulos nila sa kahago ug paningkamot niining mga drivers nga usahay, kasab an pa ug pakaulawan atubangan sa ubang drivers. Ang gihimo niining mga manghak nga taxi operators angayan gayud imbestigahon sa atong Konseho aron unta pud maprotektahan ang mga katungod sa atong mga taxi drivers dinhi sa dakbayan.
Aduna pay laing reklamo sa mga drivers nga kun dili makabayad sa ilang abangan matag adlaw tungod lagi pud sa kamingaw sa panahon, imbargohon naman hinoon sa mga operators ang drivers license, unsaon naman nila sa pagmaneho kung wala nay lisensiya?
Dapat sab unta mosabot ang mga taxi operators sa kahimtang karon sa ilang mga drivers kay lisod baya pud ang panahon, labi na nga sobra kadaghan ang mga taxi units nga nagdagan dinhi sa siyudad tungod lagi sab pud niining modus operandi diha sa LTFRB sa grabeng palusot sa mga bag ong taxi units nga ipadagan basta makabayad lang sa gipangayong SOP, tinood ba kini Director Mandangan Darimbang?
Angayan hinumduman niining mga abusadong taxi operators nga dili molambo ang ilang negosyo kung wala usab maningkamot nga mokita ang mga taxi drivers. Dapat gani unta nga sulod sa 7 ka adlaw sa pagmaneho, ihatag nalang libre sa operator ang usa ka adlaw agig bonus kanila sa ilang paningkamot ug ka loyal sa management.
Kun atong lantawon sa kinatibuk an, ang mga taxi operator nisamot ka adunahan timaan niana ang sigi ug dugang sa mga brand new nga taxi units samtang ang ilang mga taxi drivers nagkarabanit ug nahimong ataw-ataw pas-an niini ang grabeng prublema pinansiyal sa ilang pamilya.
Gikinahanglan karon nga magkausa ang tingog ug singgit sa mga taxi drivers aron batukan ug kondenahon kining sobrang pagpahimulos niining pipila ka taxi operator kanila. Atong dakung pasalamat kang Besi Mayor Ian Acenas ug Konsehal Juan Sia sa pagtagad gilayon sa mga reklamo niining mga kabus nga taxi drivers.
Happy Fiesta sa tanang Cagay-anon, Viva Senior San Augustine. 414r, 781r, 380r, 250r for 1 week. All draws. Alang sa inyong reaksyon text sa 09187095145.