NILANDING sa Northern Mindanao Medical Center (NMMC) ning siyudad sa Cagayan de Oro ang usa ka military guide human gipusil sa gituohang New Peoples Army (NPA) didto sa probinsya sa Agusan del Sur.
Giila ang biktima nga mao si Jesusimo Tapia, 36, minyo, sa susamang dapit.
Nasayran nga niadtong Miyerkules adunay engkwentro nga nahitabo batok mga sundalo og NPA sa dapit ug si Tapia ang nagsilbing giya sa mga sundalo aron itudlo ang nahiimutangan sa mga NPA.
Apan paghidangat sa lugar kalit lang nagbinayloay og bala ang sundalo ug NPA mga miresulta sa pagkaigo ni Tapia sa iyang ulo ug likod nga bahin.
Niini, gidali pagdala ang biktima sa duol nga balay tambalanan sa siyudad sa Butuan apan giduso ning siyudad sa Cagayan de Oro tungod sa grabeng naangkon niining samad.
Ning panahona nagpabilin nga kritikal ang kondisyon sa biktima ug padayon nga giobserbahan sa mga doctor.
Gikataho usab nga daghan ang naangol nga mga NPA samtang pipila usab sa mga sundalo human sa pagbinayloay sa bala. (Stephanie V. Berganio)