HUMAN mibanaw ang dugo sa Quirino Granstand sa Rizal Park, Manila, nagtinudloay kita kinsay nasayop.
Alaut kadtong mga pulis nga nagtahan sa ilang kinabuhi ug kahago tungod kay sila ang gihan-okan sa pagbasul.
Gibahinan sab sa pagbasul ang mga sakop sa media nga naghimo og live coverage sa dakong hitabo tungod kay nakabalda sila sa pulis kinsa di makalihok og maayo tungod kay nakita sila sa hostage taker sa tv monitor sa tourist bus nga iyang gisakmit.
Samtang nahitabo kini, ubay-ubay nga mga nasud nagpagawas na og travel advisory nga nagbadlong sa ilang mga lungsoranon nga dili patamokon sa Pilipinas kay peligro nga nasud.
Apan luyo niini, duna pay mga opisyal sa gobyerno nga nakaako pagsulti nga "isolated" ang hitabo.
Kun dunay laing basulon sa hitabo, dili tingali ang pulis lamang ang atong tulisokon ug labaw sab nga dili ang media.
Dihang miinit na ang sitwasyon, dihang nakita nga aburido na ang ulo sa giputbol nga pulis nga si Senior Inspector Rolando Mendoza kinahanglan na ang pagpanghilabot sa mga dagkong opisyal sa nasud nga tuohan sa suspek. Apan dili kadtong taga-Ombudsman nga maoy nagtangtang kaniya sa puwesto tungod kay dili sila makapabugnaw sa dughan sa pulis.
Siguro kun si Presidenti Noynoy, usa karon ka papyolar nga pangulo, nitingog lamang ug nipasalig ni Mendoza nga tagdon ang iyang kaso, hayan wa kita'y sakit sa ulo karon.
Kun nahitabo kini, lagmit namakpak kanato ang mga nasud, apil na ang mga molupyo sa Hong Kong nga karon hilabihan ang pagmahay ug kaligutgot kanato tungod sa kamatayon sa ilang mga igsuong Insek.
Nisipyat kita, anugon nga kahigayonan.