USA ka mag-uuma ang namatay human nahug sa pangpang sa alas 7:00 sa gabii niadtong Miyerkules didto sa siyudad sa Kidapawan.

Giila sa kapulisan ang biktima nga mao si Armando Nibrena, 53, minyo ug molupyo sa Barangay Amas.

Si Kidapawan City Police Chief Superintendent Chino Mamburam nagsulti nga nakit- an sa mga sibilyan ang patay nga lawas sa biktima nga nagkadugo ug wala nay kinabuhi nga nahug sa lawom nga bung-aw sa kilid sa kalsada didto sa Barangay Amas sa maong siyudad.

Matud sa mga imbestigador sa kapulisan nga una nakaplagan ang patay nga lawas ni Nibrena, nakit-an siya nga nag-inom uban ang iyang mga barkada.

Gituohan sa kapulisan nga aksidenteng nahug ang mag-uuma sa pangpang gumikan sa sobrang kahubog gawas nga ngitngit sab kaayo ang maong lugar.

Apan duda ang pamilya sa biktima nga dunay foul play sa hitabo gumikan kay ilang nakita nga mura'g gibundakan og bato ang iyang ulo ug gihug sa pangpang.

Hinuon, gipasalig ni Mamburam nga padayon silang mag-imbestiga sa tinuod nga hinungdan sa kamatayon sa mag-uuma. (Edgardo Fuerzas)