4, apil ang taga Davao Norte, napatay sa Lanao del Norte

UPAT ka mga tawo, apil ang duha ka sakop sa Philippine National Police nga taga Davao del Norte ug taga siyudad sa Cotabato, ang namatay human girapido ug gisunog ang bus nga ilang gisakyan didto sa Kapatagan, Lanao del Norte kagahapon sa kaadlawon.

Sila si PO2 Jovito Cabigas, taga Sto. Tomas, Davao del Norte, ug si PO3 Rosalito Obatay, taga siyudad sa Cotabato lulan sa bus nga gipanag-iyahan sa Rural Transit Mindanao Incorporated (RTMI) sa dihang nahitabo ang insidente.

Mga biktima maoy nagsilbing bus marshall sa RTMI.

Matud ni Kapatagan Mayor Benjie Baguio nga nag-checkpoint ang wala mailhing mga armadong lalaki sa Barangay Balili ug sa dihang miagi sa ilang nahimutangan ang bus gilayong gipaulanan kini og mga bala.

Nasayran nga namatay si Cabigas sa pagrapido sa mga armado samtang si Obatay naapil pagkasunog sa bus, lakip na ang drayber nga si Jaime Duhaylungsod ug ang konduktor nga si Archie Castasa.

Sumala pa nga gikan sa Cagayan de Oro ang bus sa gabii niadtong Miyerkules ug padulong unta sa siyudad sa Zamboanga. Apan sa pagkaadlawon kagahapon sa paghidangat sa maong dapit nahitabo ang insidente.

Nasayran nga niadtong milabayng Hulyo, duha usab ka RTMI bus ang gisunog sa wala gihapon mailhing mga suspek sa Lanao del Norte ug sa Lanao del Sur.

Gilusad na karon sa militar ug kapulisan ang manhunt operation batok sa mga armadong grupo. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph