NASUGAMAK sa grabeng pagsaway si Presidente Noynoy Aquino gikan mismo sa mga taga Hong Kong human sa iyang gipatawag nga press conference kalabot sa dugoong hostage drama sa Quirino grandstand diin nakitang nagsige’g ngisi ang atong pangulong nasud. Kini nakapasuko kaayo sa mga Hong Kong national nga nagbangutan sa gidangatan sa ilang kaliwatan kay nila pa, ang maong panagway sa kalipay sa atong nasudnong pangulo nagpakita lamang sa kakuwang sa respeto sa gidangatan sa mga biktima.
Dali hinuon kaayong nakapangayo og pasaylo si Noynoy ug mipasabut nga ang mao niyang pagngisi-ngisi produkto lamang sa iyang kahimangud sa kakalit sa panghitabo, apil ang nagsagol nga gibati nga daw sama sa komedya ang maong insidente nga nagbutang sa dakong kauwawan sa nasod. Apan bisan pa man ning maong pagpaubos, ang Facebook page sa Presidente ang gibahaan lang gihapon og mga pagsaway og mga pagmahay kay lagi ang sentimento mao nga nawagtang si Noynoy sa panahon nga siya gikinahanglan aron unta sa pagkurihir sa nagkaguliyang nga trabaho sa ground commander.
Dili pa gyud igo, apil nga gipadangat ang pwerte ka bastos nga mga mensahe nga naghingan kang Noynoy nga iro, idiot ug walay respeto apil ang panawagan nga mokanaug na siya sa puwesto kay walay hinungdan ang iyang pangobyerno.
Dili trabaho sa Presidente ang pagkanaug sa Malakanyang aron maoy mo-asumir sa trabaho sa pulis. Siya mamahimo mang motawag ug momandar sa Hepe sa Philippine National Police, DILG Secretary ug uban pang mga departamento apan subo nga palandungon nga wala kini mahimo ni Noynoy Aquino. Kay mismo si Tourism Secretary Alberto Lim nga atong ekslusibong nahinabi sa dyRF Radyo Fuerza, ang mikumpisal nga sa milanat nga 11 ka oras nga standoff sa Quirino Grandstand, wala siya nakatawag ug wala usab siya gipatawag sa Presidente. Mao nga wala siya’y ideya kon diin si Noynoy niadtong mga higayuna kay siya usab ang naningkamot nalang sa pagpanisikaysikay sa pagpangontak sa mga industry player sa turismo sa nasud aron makamugna sila og mitigating measures.
Unya sa pagkahuman sa trahedya nga mao na untay atimanon ang damage control ug pakigduyog sa mga nagbangutan. Ang iyang mga sakop wa gyud tawun makaatiman sa pamiste ug pahimangno sa facial expression sa ilang boss, hinungdan nga migawas gyud ang mannerism niini nga mongisi bisan og walay angay kataw-an.
Hasta ang mensahe ni Noynoy ang wala sab magkadimao kay nangayo naman unta kita og pasaylo apan gi-apilan pa gyud sa pagpangandak nga dili lamang kita sa Pilipinas ang nasugamak og susamang mga krisis sa hostage crisis kansang pagsulbad ang wala magkadimao kay nakita man sab sa kalibutan ang nanghitabo kaniadto sa Russia ug Germany.
Mientras sayo pa, angay nga paninglan ni Noynoy kining iyang mga sakop nga walay tarong nga gikahatag niyang panerbisyo kay basin sa kaulahian, mapugos unya kita sa pagdawat sa kamatuoran sa yaga-yaga sa mga pikot nga ang atong pangobyerno ang tinuod nga walay hinungdan.