MI-ANGKON ang kadagkuan sa kapulisan kabahin sa ilang palpak ug bulilyaso nga rescue operation niadtong mga Hong Kong national nga gi-hostage ni Sr. Inspector Rolando Mendoza sulod sa usa ka tourist bus. Niangkon man tuod sila sa ilang kapalpakan, apan mirason pa ug mitumbok sa media nga maoy naka-ingon nga misangpot sa duguon nga hitabo ang maong hostage crisis.

Kon moangkon man gani sila, dili na nga mohatag pa og rason o ipahid pa ngadto sa uban ang ilang sipyat. Sayop sila, dan sayop. Nangayo naman gani sila og pasaylo apil na si Pres.

Noynoy Aquino sa kagamhanan sa China ug Hong Kong ug ingon man sa mga kabanay sa mga biktima. Gipangrelibuhan na ang mga nahilambigit ug posibling mag-atubang og imbestigasyon.

Updates on President Benigno Aquino III's presidency

KINATIBUK-ANG HULAGWAY

Gibasol sa kapulisan ang media kay nganong gipakita sa television footage ang pagdakop sa igsuon si Mendoza nga si Gregorio nga usa usab ka pulis. Mao kadtong situwasyon nga nakapasilaob ni Mendoza nga birahan niya ang iyang mga hostages. Kadtong hitabo, usa lamang sa kinatibuk-ang hulagway sa hostage crisis. Kay ngano man diay kadtong gihimo sa mga pulis nga pagbuak sa bentana sa tourist bus, pagsuway pag-abli sa pultahan ug pag-assault, wala diay makatukmod kang Mendoza nga ihawon na lang ang iyang gipang-hostage? 

Dili kadto matapos sa duguong hitabo kon sa sinugdanan pa maayo ang pagkadala sa mga negosyador. Wala magkadimao ang paghawid sa situwasyon sukad pa sa sinugdanan. Bisan ang mga expert sa hostage crisis situation sa ubang nasod nga nakakita sa maong insidente, nakasaway sa gihimo sa kapulisan. Walay tarong nga estratehiya. Walay maayong training ang mga mirespondeng pulis.

Walay insaktong gamit. Walay insaktong plano ug determinasyon sa pag-rescue sa mga biktima. Daghan pa kaayong mga pagsaway. Unya media dayon ang basulon.

TRAVEL ADVISORY

Dakong epekto sa turismo ang nahitabo nga pagpanghostage. Tiaw ba nimo kanang daghang mga Hong Kong tourists ang mikanselar sa ilang pagbisita unta dinhi sa nasud. Ang ubang kanasuran mipagawas og travel advisory o pahimangno sa ilang mga citizen nga likayan ang pagbisita dinhi sa Pilipinas.

Maayo natong promote sa turismo sa nasod kay mao kini ang usa sa atong mga pambatu sa mga langyaw. Apan giguba lang ang atong imahin sa atong kapulisan gumikan sa palpak, bulilyaso ug maka-uuwaw nga rescue operation nga miresulta sa masaker. Pagka-way ayo.

(bgnalzaro@gmanetwork.com)