Joel Lawes

Brgy. Bawo, Sogod, Cebu

NAGKAGUBOT sa gawas. Dihay nagdinaganay. Nanambo ko sa bentana sa among balay. Nakita ko si Ruel, akong barkada.

“Unsay nahitabo, Bay Ruel?” matod ko paghitungod na sa akong higala kanako.

Updates on President Benigno Aquino III's presidency

“Si Darwin, Bay, gidunggab!”

Wa na ko makasultig usab kay mipadayon si Ruel. Nakugang gyud ko sa akong nasayran.

Nagdali kong nananaog. Kilumkilom na niadtong tungora. Misunod ko sa mga tawo nga nagdali paingon sa usa ka dapit sa among lungsod.

Upat kaming barkada. Ako, si Ruel, Jonas ug Darwin. Pulos kami nagtrabaho sa munisipyo. Si Darwin ang labing ambungan namong upat ug siya ra usab ang ulitawo.

Pag-abot nako sa merkado nga maoy nahitaboan, gisakay na si Darwin sa ambulansiya.

Nakita ko si Ruel nga unang nahiabot nako. Giduol ko siya.

“Asang ospitala dad-a si Darwin, Bay?” Gisundan ko pagtan-aw ang nagngiyaw nga ambulansiya.

“Sa ospital dinhi, Bay. Kon grabe ang samad ni Darwin, seguradong ipadala kini sa siyudad.”

Nakapanglingo si Ruel. Nanaguto. Miginhawa sab kog lawom.

“Di man god maminaw sa atong tambag, Bay Zander. Giingnan nato nga likayan na niya ang babaye, sige lang gihapon.”

“Ang buot mong ipasabot, Bay, nga nasayod na ang bana?” Nakapanglingo sab ko.

“Molang! Tan-awa, nadunggaban gyud sa bana. Maayo lang untag maluwas siya.”

Amo nang gisultihan si Darwin nga likayan si Lolita kay minyo kini. Duna man untay mga dalaga nga kauban namo sa trabaho sa munisipyo ang nakagusto kaniya apan ang minyong dako gyud ang nakursunadahan. Nagkarelasyon gyud sila.

Dunay dakong tindahan sa among dapit si Lolita, bayinte singko pa ang edad. Matahom siya. Hamis kaayog panit ug nindot pa gyud og lawas. Ang iyang bana nga si Isidro sa siyudad magtrabaho. Mopauli lang matag Sabado sa gabii. Sa tindahan ni Lolita kami mag-inom og beer. Nasuki kaming upat ni Lolita. Ug kini ang hinungdan nga nagkasuod si Darwing ug si Lolita nga misangpot sa gidiling gugma.

DI grabe ang samad ni Darwin. Wa na lang siya dad-a sa ospital sa siyudad. Giduaw ko siya sa ospital sa among dapit.

“Unsa na, Bay? Mousab ka pa?”

“Di na, Bay, uy, kay basig madayunan na ko sa sunod.”

“Unya unsay plano mo karon?” Magul-anon si Darwin sa tan-aw ko. Tinud-anay ang iyang pagbasol. “Mokiha ka sa bana?”

“Di na lang, Bay. Ako man say nag-una-una. Nabaslan lang ko.”

“Ingon gyud ani ang kinabuhi, Bay Darwin. Bawos-bawos lang. Busa, magbuhat gyud tag maayo aron kaayo ang ibawos nato.”

Dali rang nakagawas sa ospital si Darwin. Nakabalik na sab siya sa trabaho. Apan laing tindahan na ang among imnanan og serbesa. Giserad-an na ang tindahan nila ni Lolita.

Gidala na si Lolita sa iyang bana sa siyudad. Tua na sila manimuyo didto.

Malinawon na kami si Ruel ug Jonas alang sa kaugmaon sa among higala. Nag-ampo mi nga magminyo na siya. (KATAPUSAN)