NAALARMA karon ang kapulisan sa lungsod sa Compostela sa modus sa mga tulisan nga mopasimhot og gapas nga gibutangan og kemikal aron makatulog ang ilang biktima.
Una niini, usa ka batan-ong lalake gibinaklid sa paggapos sa duha ka batan-ong lalake, gibaatan ang baba dayon gipasimhot sa gibasa nga gapas dayon nawad-an sa iyang panimuot niadtong Martes sa gabii sa Sitio Guiwanon, Brgy. Estaca, lungsod sa Compostela.
Ang biktima giila sa kapulisan nga si Roy Tudtud Mondrano,18, ulitawo, taga Brgy. Matab-ang, dakbayan sa Toledo gibilin sa kalibunan nga ginapos ug gibaatan ang baba.
Si SPO3 Wilfredo Catorza, imbestigador sa kapulisan sa lungsod sa Compostela, nga nahinabi sa Sun.Star Superbalita, nagkanayon nga si Mondrano nibutyag nga nawala ang Cherry mobile phone sa iyang iyaan nga nisakay og PUJ sa Compostela niadtong miaging simana.
Matod niya nga gisugo siya sa iyang iyaan nga tawagan ang numero sa cellphone nga nawala aron masuta kon napunitan ba kini o nahanaw na sa hingpit.
Pagka-Martes sa buntag iyang natawgan ang number sa iyang auntie diin usa ka babaye nga nagpailang Liezel nitubag kaniya nga iuli niya ang cellphone ug magkita sila sa samang adlaw sa Compostela.
Nisakay ang biktima sa usa ka Ceres Bus Liner gikan sa Toledo, paingon sa lungsod sa Compostela ug niabot pagka-alas 9:00 sa buntag sa samang adlaw.
Nikanaog siya sa atubangang bahin sa munisipyo sa nahisgutang lungsod.
Nag-standby pa ang biktima hangtod na sa pagka-alas 6:00 sa gabii dihang nakadiseder siyang molakaw sa gikan sa municipal plaza ngadto na sa boundary sa Sitio Guiwanon Brgy. Poblacion ug Brgy. Estaca sa nahisgutang lungsod.
Si SPO3 Catorza niingon nga didto sa boundary nagkakita ang biktima ug si Liezel ug gihatag ang cellphone sa iyang iyaan bugti sa P300.
Human niini nagbuwag silag pagpanglakaw, apan wa pa gani siya makalakaw og layo, kalit lang niabot ang gidudhang mga kauban sa babaye.
Dayon gibunlot ang biktima ug gidala sa ngitngit ug kasagbutan sa nahisgutang lugar.
Gipanguha ang iyang dalang mga butang nga fatigue belt bag nga balor og P2,000, cellphone nga balor og P1,500 ingon man ang cell phone sa iyang auntie balor og P3,000 ingon man cash nga P1,600.
Human makuha ang iyang mga butang ug kwarta, ang duha ka mga suspek nibinaklid sa paggapos sa iyang duha ka mga kamot ug tiil ginamit ang usa ka bakos, ingon man panapton, lakip na ang iyang baba.
Wa pa matagbaw ang mga suspek, nikuha kini sa basa nga gapas ug gipasimhot kaniya hinungdan nga kalit lang siyang nalumoy ug nawad-an sa iyang panimuot niadtong higayuna.
“Naalarma mi diri sa Compostela Police Station sa maong insidente. Kuyaw kaayo ni ang mga tulisan mobutang og kimikal sa gapas unya ipasimhot sa ilang mabiktika. Kuyawan ta kay simbako mga babaye maoy biktimahon niini unya lugoson,” sumala pa ni Cartorza.
Siya nipadayag nga ang biktima nitug-an nga pagka-Miyerkulis na sa alas 7 sa buntag siya nakamata ug nakahimo sa pagtangtang sa gapos sa iyang mgha kamot ug tiil.
Dunay bata nga niagi sa lugar nga nitug-an sa brgy. tanod ug gikuha ang biktima ug gidala sa police station.
Kay gigutom kini ug luya ug ilang gipakaon.
“Bisan nagduda mi sa iyahang pangangkon, amo gihapong gihimuan og imbestigasyon. Dunay mga alaegasyon niini nga layo na kaayo sa oras sa insidente pero luya gyud siya. Dili hinuon adik-adik maayo man,” sumala pa ni SPO3 Cartoza.
Matod pa niya nga kakunsabo sa batan-ong babaye nga nagpangidaron lang og 16 ang laing duha ka mga lalake nga nagpanuigon og 20 pataas.
Hinuon ang biktima nipasalig nga kon makit-an niya ang mga suspek iyang mailhan sanglit wa kini magtaptap sa nawong ug ang usa nihubo sa gisul-ob nga kawo.Gisubay na nila karon ang mga personalidad sa ilang lungsod, sama sa mga batan-on nga dunay gang ug fraternity nga posibling maoy nalambigit sa maong krimin. Nanguha pa sila karon og dugang mga ebedensya batok sa mga grupo sa mga batan-on.