DUL-AN sa duha ka milyon ka pesos, wa pay labot sa importanteng mga butang ug dukomento ang nakuha gikan sa usa ka Japanese national kinsa nabiktima sa pagpanglungkab sa dakbayan sa Lapu-Lapu.

Samtang ang gituohang nilungkab mao ra usab ang security guard nga nagbantay sa iyang establisemento.

Updates on President Benigno Aquino III's presidency

Ang ni-report sa Lapu-Lapu Police Station giila nga si Yoshikatso Hirata, tag-iya sa Paraiso Com Dream Inc.nga nahimutang sa Sudtongan, Barangay Basak.

Matod niya nga ang iyang lawak gilungkab ug nawala ang iyang kuwarta nga P900,000, usa ka milyon nga yen, camera ug mga importanting dokumento sama sa passbook, passport, ug mga identification (I.D) card.

Sa gihimong follow-up operation sa mga sakop sa Theft and Robbery Section (TRS) pinangulohan ni Insp. William Humoc ug mga kauban, ilang nasayran nga ang nihimo niini mao ra usab ang iyang security guard nga adunay kuyog nga laing duha ka mga tawo.

Ang security guard naila nga si Jerry Senabre, 31, taga barangay Sinsin, dakbayan sa Sugbo.

Ang laing duha nga sila si Limbert Gerbese, 18, taga Tambulig, Zamboanga Del Sur ug ang usa naila lang sa ngan nga si Ricky, taga lungsod sa Badian.

Ang mga gikatahapan nitangtang sa aircon sa lawak hinungdan nga nakasulod ug nakuha ang kuwarta ug mga butang.

Sa follow-up operation wa na nila maabti si Senabre sa ilang balay. (DRT)