MAKADAGINOT na sa tubig ang Rehiyon 7 human gilusad sa Department of Science and Technology (DOST) 7 ang integrated storm water management system.
Gidungan kagahapon sa paglusad ang maong water management system sa bag-ong natukod nga Lahug Science and Technology Complex nga gipangulohan ni DOST 7 director Rene Burt Llanto.
Nipasabot si Llanto sa pinaagi sa eco-efficient water infrastructure development facility nga kalikayan na sa pagbaha sanglit isawod na ang uwan ingon man ang pag-recycle sa tubig pinaagi sa rain water treatment.
Nasayran nga ang bag-ong facility diin ang rehiyon maoy pilot area sa maong proyekto mosawod sa tubig sa uwan nga matigom ngadto sa tangke nga adunay capacity nga 140 ka tonilada sa tubig.
Ang tubig ipaubos sa filtration nga mosubay sa micro-filtration system gikan sa mga rainwater drainage tank aron sa paglimpyo ug luwas nga gamiton.
Samtang kadtong gray water o ginamit na nga tubig mamahimo gihapon nga kapuslan sa higayon nga ipa-ubos usab sa treatment.
Dugang pa ni Llanto nga adunay igong alternative water resources sa higayon nga hingpit kining i-adopt ug kaminusan na ang water bill sa matag balay gikan sa water supplier. (FVQ)