GITUMBOK nga killer sa magtutudlo sa Tubod Elementary School sa lungsod sa Minglanilla nadakpan na sa kapulisan sa miaging gabii human sa usa ka buwan nga pagtago-tago didto sa iyang giabangang balay sa Brgy. Panadtaran, lungsod sa San Fernando.

Ang suspek kanhi driver sa ambulansya sa lungsod sa San Fernando ug kanhi overseas foreign worker (OFW).

Updates on President Benigno Aquino III's presidency

Si Noel Yapparcon 37, buwag sa asawa, lumad nga taga Puerto Princesa, Palawan nadakpan pinasikad sa search warrant nga giisyu ni Judge Meinrado Paredes sa Regional Trial Court (RTC) branch 13.

Ang grupo nila ni Chief Insp. Romeo Santander, hepe sa Regional Special Operations Group (RSOG-7) maoy nakadakop kang Yapparcon, kinsa nakuhaan sa possession og .22 kalibre nga revolver, usa ka kalibre .45 nga pistola, usa ka magazine ug unom ka mga bala nga way lisensya.

Si Santander, nga nahinabi sa Sun.Star Superbalita, nagkanayon nga si Yapparcon positibong gitudlo sa ilang tulo ka testigos nga duha ka 13 anyos, babaye ug lalake, ingon man usa ka 23 anyos nga babaye nga maoy nipusil patay kang Villahermosa niadtong July 19.

Matod pa ni Santander, nga moabot sa usa ka bulan ang ilang pagtapot-tapot sa mga ebidensya batok sa akusadong si Yapparcon, dihang ilang na kumplito ang carto sketch niini gipakita nila sa ilang mga testigos ang dakong hulgaway.

Nakatabang usab sa ilang imbestigasyon sa kaso ang pagkuha nila dugang mga larawan sa akusado diha sa Facebook niini diin nasutang sakop kini sa usa ka motor cross, ingon man sa usa ka gun club dinhi sa dakbayan sa Sugbu.

Hinungdan nga dihang cited ang akusado niadtong ni-aging buntag diha sa gi-abangang balay niini daling nikuha silag search warrant sa korte gumikan usab kay kanunay kining makit-ang magloklok sa iyahang armas.

Positibong nadakpan ang akusado ug nakuhaan sa maong mga armas nga walay lisensya.

Si Santander niingon nga base sa ilang nakuhang impormasyon nakit-an gyud sa tulo ka mga testigos si Yapparcon, nga nisulod sa gate nianang hapon sa Hulyo 19 sa Tubod Elementary School sa Minglanilla dihang gipusil ang magtutudlong si Serafin Villahermosa.

Human gipatay si Villahermosa, giingong kalit lang nahanaw si Yapparcon sa ilang barangay.

Bag-uhay lang kining nakit-ang nibalik niadtong Agusto 20 ug 24.

Gipahibawo ni Santander nga niadtong Agosto 11 ang asawa sa biktimang magtutudlo niduaw sa ilang buhatan aron pagpadangat sa iyang hangyo nga papaspasan pa ang pagresulbar sa kasong pagpusil patay sa iyang bana.

Apan gumikan sa kalangay nila sa pagkuha sa affidavit sa mga menor de edad nga saksi batok sa akusado, wa gilayon nila mapasaka ang kasong murder batok niini hinungdan nga gipaabot nilang makumpleto.

Gipadayag niini nga una, lima unta ang ilang testisgos apan sa katapusan tulo na lang ug giubanan sa ilang mga ginikanan sa ilang pagduso affidavit sanglit mahadlok gyud sa akusado.

“Among gipakita ang carto sketch sa akusado ngadto sa mga bata. Ingon man ang dako nga colored picture. Positibong giila. Gani nangahadlok ang mga bata ug nanghilak,” sumala ni Santander.

Ang akusado nga ni-atubang sa mga sakop sa media kagahapon hugtanong nanghimakak sa maong pasangil.

Matod niya nga gi-frame-up lang siya sa kapulisan dihang gidakop ug planted ang mga ebedensyang armas nga nakuha gikan kaniya.

Gipanghimakak niini ang krimem sanglit atol niini dinhi siya sa dakbayan sa Sugbo nangumprag sinina sa usa ka shopping mall.

Duna hinuyon siyay mga ebedensyang ikapakita niini pagpamatuod.

Gipadayag niya nga nagtrabaho lang siya isip sales agent sa real estate human siya matangtang isip driver sa ambulansya sa lungsod sa San Fernando human mapildi ang mayor sa nahisgutang lungsod sa miaging election.

Apan si Santander niingon nga gitahod nila ang pamahayag sa akusado apan “adto nalang unya mi magdaog sa korte.”