MAS gipahugtan sa mga sakop sa Cagayan de Oro City Police Office (Cocpo) ang seguridad sa kapistahan nga gisaulog kagahapon ug karong adlawa ning siyudad sa Cagayan de Oro.

Namatikdan sa bisan asang kadalanan ang kapolisan nga nakabantay aron paghatag seguridad sa mga bisita.

Post your reaction to the Manila hostage crisis

Bisan sa mga malls, mga balay kalingawan, carnival ug uban pa makita ang ang mga naka-uniporme nga kapolisan.

Samtang si City Police Director Benidecto Lopez namatikdan mismo nga anaa sa dapit aron pagbantay usab sa palibot. Gani atol sa Ms. Kagay-an coronation night namatikdan ang iyang presensya gawas sa maong establismento.

Si Police Superintendent Danildo Tumanda, hepe sa Public Safety Management Battalion niingon sa Sun.Star Superbalita nga alerto ang tibuok sakop sa Cocpo labina nga ubay-ubay sa mga kalingawan ang gihimo ning siyudad.

Gihimo na usab ang bag-ong rota sa mga sakyanan aron malikayan ang paghuot sa trapiko.

Nasayran nga mokabat 700 ka mga polis gikan sa Cocpo ang nakaalerto samtang mokabat 200 ka polis gikan usab sa Police Regional Office-Northern Mindanao (PRO-X).

Nakig-coordinate usab ngadto kanila ang Fourth Infantry Division (4th ID).

Gani moabot usab ngadto sa 400 ka mga traffic enforcers ang anaa sa kadalanan aron pagpatuman sa kahapsay sa trapiko.

Dugang ni Tumanda nga ilang gilantaw ang kalinaw ug kahapsay sa dakbayan ning kasaulogan sa kapistahan. (Stephanie V. Berganio)